Despues di un luna di protesta social na Chile, cu a laga 23 morto y mas di 2 mil persona civil herida, Polis a anuncia cu ta suspende e uzo di bala di hagel, utilisa como material anti disturbio pa agentenan.
Solamente e herment aki, cu ta emplea pa forsa di siguridad contra e manifestantenan, a laga 964 persona lesiona, entre nan 222 persona cu problema den su wowo, segun dato di Instituto Nacional di Derechonan Humano (INDH).
“Lo por ta utilisa solamente, igual cu armanan di candela, como un medida extremo y exclusivamente pa defensa legitimo, ora haya un peliger di morto” Carabinero e Polis Chileno, a señala den un comunicado diamars pasa. A tuma e medida despues cu Universidad di Chile a contradeci cu un estudio cientifico e version oficial cu e balanan tabata di rubber. Segun dicho informe, ‘20% so ta di rubber y 80% cu resta ta di elemento como silicio, sulfato di bario y chumbo’.
E episodio aki ‘ta demostra cu na Chile no ta existi un Gobierno civil riba Polis. Polis ta dicidi pa su mes”, segun Lucía Dammert, academico di Universidad di Santiago y experto den siguridad. “Ken ta encarga di e Gobierno aki? E actual, e anterior y cualkier, pa zorg cu e compra di Polis no ta corupto so, sino cu ademas, ta esun mas adecua? Ni un hende.” Na su huicio, ‘di acuerdo cu derecho internacional ta dificil pa papia di violacion sistematico di derechonan humano actualmente na Chile, sino di un uzo sistematico di parti di Polis di violencia, apoya pa e mundo politico cu a deriva varios caso di violacion pa derechonan humano’.
