Un polemica fuerte a cuminsa na Chile despues cu un grupo di 300 Colombiano mester a firma un declaracion bisando cu ta prohibi pa nan bolbe na e pais durante 9 aña. E grupo aki, cu a keda pega na Chile pa via di coronavirus, tabata wardando pa un vuelo cu a wordo disponi pa Gobierno.
E documento tambe ta pidi nan renuncia pa tur solicitud di residencia of refugio, of status di refugiado den caso cu tin’e, organisacionnan di inmigrante a denuncia.
Ta cerca di 350 Colombiano cu tin un luna campando dilanti di Consulado General di nan pais na Santiago de Chile y casi 50 Ecuatoriano cu a acepta e condicionnan di Gobierno Chileno, cu tin calcula cu lo por cubri e gastonan di nan vuelo di regreso, segun e Coordinado Nacional di Inmigrantenan.
“Nan tambe sa kico ta nifica, pero nan ta sin trabou ni luga na unda por biba y nan kier bay bek nan pais si of si. Nan ta consciente cu nan ta chantahia, pero esey ta loke nan tin” e presidente di e asociacion, Hector Pujols a comenta.
Algun di e migrantenan a keda pega pa via di e cancelacion di nan biahe pa e pandemia di coronavirus, mientras cu otro a keda afecta pa ceramento di fronteranan di ambos pais Latino Americano.
“Ta bisa cu ta boluntario, pero ora un persona a perde su trabou, su cas, incluso e apoyo di su mesun pais, e berdad ta cu no tin libertad pa firma: nan no tin otro opcion”, director di Servicio Hesuita pa Migrantenan, Jose Tomas Vicuña a opina.
Mientras centenares di Latino Americanonan – principalmente di Colombia, Bolivia, Ecuador, Peru y Venezuela – tin simannan campando dilanti nan sedenan diplomatico den espera di un solucion.
