Partido Comunista di Chile (PCCh) kier pa presidente di e pais, Sebastián Piñera, responde na Corte Penal Internacional pa violacionnan di derechonan humano cu a sucede durante e crisis, denuncia pa distinto organismo, segun lider Guillermo Teillier a confirma diahuebs ultimo.
“Nos ta studia un presentacion na Corte Penal Internacional, tin un ekipo di hurista cu ta prepara y lo bay ta cla proximo siman”, Teillier a apunta.
E partido lo manda pa tribunal internacional, cu sede na Den Haag (Hulanda), e informe elabora pa Oficina di Alto Comisionado di Nacionnan Uni pa Derechonan Humano (Acnudh), Comision Inter Americano di Derechonan Humano (CIDH), Human Rights Watch (HRW) y Amnistia Internacional (AI).
E cuatro organismo a denuncia cu e forsa di siguridad Chileno a comete violacionnan grave di derechonan humano, como tortura, uzo excesivo di forsa, detencion ilegal y agresion sexual, durante e explosion social cu e pais ta biba desde luna di october.
E formacion a manda ademas e informe di Instituto Nacional di Derechonan Humano (INDH), cu a introduci den tribunal Chileno un total di 943 denuncia contra agentenan di Estado.
Piñera, hopi critico cu e informe di e organismo internacional, a reconoce abusonan puntual, pero a nenga un politica sistematisa pa ataca e manifestantenan y a compromete pa investiga e hechonan.
Partido Comunista tabata un di e formacion opositor cu a apoya e presentacion di un acusacion constitucional na Parlamento contra Piñera, cu a ser rechasa dia 12 di december y cu den caso cu lo a prospera, lo a causa su inhabilitacion politico.
