Papa Francisco a acepta e renuncia di arsobispo di Santiago di Chile, e cardinal Ricardo Ezzati, ken tabata investiga pa husticia local pa acusacionnan di sconde abusonan sexual di mucha di parti di sacerdotenan.
E decision di e lider catolico a sucede na momentonan cu e Iglesia ta enfrenta critica fuerte pa e forma con a contesta pa e scandalnan di abusonan sexual, cu a explota na varios luga di mundo.
Ezzati, di 77 aña y ken tabata ocupa e cargo maximo di e Iglesia di Chile, ta acusa di sconde abusonan cometi pa religiosonan, aunke te ainda no a formalisa un cargo den su contra. E cardinal ta nenga di tin vinculo, y na october, el a dicidi di eherce su derecho pa mantene silencio despues di su cita pa declara cerca e fiscalia local.
E Vaticano den un comunicado a bisa cu Papa Francisco a designa e Obispo Celestino Aós Braco di e ciudad di Copiapó, na e nort di Chile, como ‘administrador apostólico’ pa cargo di e arkidiocesis di Santiago, den e espera di un arsobispo nobo pa reemplasa Ezzati.
E anuncio a ser produci un dia despues cu e tribunal Chileno a rechasa un apelacion pa suspende un investigacion den contra di Ezzati pa supuesto cubrimento di abusonan di sacerdote, meymey di e scandal cu a golpia e iglesia na e pais Suramericano.
Na mei di aña pasa, 34 obispo Chileno a presenta su renuncia cerca Papa Francisco, despues di asisti na un reunion di emergencia na Roma pa trata e denuncia y cubrimento di abusonan.
