Un mision di ONU cu lo investiga posibel violacionnan di derechonan humano durante e protestanan reciente y lo ta forma pa tres experto, lo yega na Santiago dialuna awor pa traha riba e tereno te dia 22 di november, Nacionnan Uni a detaya ayera.
E grupo di experto “lo purba di reuni cu funcionarionan di Gobierno, representantenan di sociedad civil, victimanan, institucionnan nacional di derechonan humano y otro personanan implica pa recoge informacion valioso”, e vocero di Oficina di ONU pa Derechonan Humano Ravina Shamdasani a informa.
Un fuente oficial a señala cu e Comisionado Halto di e oficina, Michelle Bachelet, a tuma e decision di manda e mision aki pa via cu un grupo di parlamentarionan Chileno a solicita esey, aunke a sigura cu Gobierno di Chile tambe a emiti un invitacion formal.
E mision, di cual no a revela su componentenan, lo bishita varios ciudad Chileno den cual a registra incidentenan violento y lo traha hunto cu e sede regional di Oficina di ONU pa Derechonan Humano, ubica na Santiago.
E expertonan lo investiga informe cu ONU a ricibi tocante presunto violacion di normanan internacional riba e uzo di forsa na man di e cuerpo di siguridad, pero tambe denuncia di crimen cometi pa otro actornan den e protestanan.
Esaki ta e di dos mision di e tipo aki cu e oficina di ex-Presidente Michell Bachelet ta manda den relacion cu e jornada di protesta, cu den ultimo lunanan a sosode pa diferente causanan na Latino America, ya cu actualmente un grupo parecido di tres experto ta na Ecuador.
