Instituto Nacional di Derechonan Humano (INDH) ayera a informa cu a ricibi casi 2.300 denuncia pa violacion di Derechonan Humano desde e comienso di e protestanan dia 18 di october pasa, cu ya caba a laga 20 persona fayecido, seis di nan stranhero.
Asina a comunica e sede Regional Metropolitano di INDH, e departamento publico independiente cu ta studia e protestanan riba tereno, den un comunicado cu a publica ayera den e jornada number 21 di mobilisacion.
E Instituto a sigura cu mayoria di denuncia ta indica ‘acto vulnerabel’ di cuerpo di Carabinero di Chile durante e tres siman di manifestacion, tambe di efectivo di e Forzanan Armadas durante e estado di emergencia cu a decreta e presidente Sebastina Piñera.
Di e mas di 2.000 denuncia presenta, 72 ta acusa e forsa di siguridad di ‘tortura’, tambe a inclui esun di caracter sexual.
Diaranson pasa, precisamente 14 agente Carabinero a formalisa dos caso di tortura, un di nan contra un menor di edad, cu a comete dia 21 di october ultimo, durante e protestanan den varios ciudad di Chile.
E manifestacionnan y protestanan violento cu a registra na Chile den e explosion social ta suma te ayera 21 dia, cu un cifra di miles di persona deteni y herida.
A presenta centenares di denuncia pa abusonan, tortura y violencia di parti di forsa di siguridad y ONU a dicidi di manda un ekipo di observador pa documenta posibel violacion di derechonan humano.
