Mas di cien mil persona a participa diasabra pasa den e Marcha di Orguyo na Santiago, pa exigi un stop di violencia contra e ‘personanan di diversidad sexual y di genero’, como tambe ‘igualdad pleno legal’ pa e comunidad LGBTI, e organisadonan a indica.
E marcha a cuminsa na e Plasa Italia di e capital Chileno, unda trucknan cu musica y un ambiente di fiesta a ricibi e prome manifestantenan, convoca pa e Fundacion Iguales y Movemento di Integracion y Liberacion Homosexual (Movilh).
Cartelnan, frase pinta riba nan curpa, a celebra e convocatorio multitudinario, cu tabatin como principal obhetivo pa logra un ‘Chile mas husto y igual pa tur e personanan, sin importa su orientacion, expresion of identidad di genero’.
Akinan, e organisadonan a celebra e aprobacion reciente di parti di e Camara di Diputado di e proyecto di adopcion homoparental, cu ta establece cu tur e famia, sin importa su composicion, lo por inicia e tramite di adopcion.
Un medida cu awor ta pendiente di votacion den e Senado, pero cu ta bisto pa e comunidad LGTBI como un manera di “sigura e interes superior di muchanan mediante evaluacion di tur e famia disponibel, sin distincion arbitrario”.
Na e momento ey, nan a conseha e Ehecutivo di Sebastian Piñera pa cumpli e compromisonan di estado di Chile den e Comision Interamericano di Derechonan Humano tocante e colectivo Lésbico, Gay, Bisexual, Trans y Intersexual (LGBTI), entre cual ta e aprobacion di e matrimonio igualitario.
