(Infobae) – Starlink e red di satelite cu lo ofrece internet satelital, propiedad di SpaceX, compania di e empresario multi miyonario Elon Musk, lo test su servicio na dos pueblo cu awendia ta desconecta na Chile.
E noticia a wordo anuncia pa gobierno Chileno e siman aki, lo ta e prome pais na Latino America na unda lo por haci pruebanan di funcionamento.
Asina, e compania di Elon Musk a acorda cu e gobierno di proporciona internet satelital pa 2 comunidad rural y/of aisla cu problemanan di conectividad digital, mediante un permiso special pa cu e empresa lo realisa su operacion sin fin comercial. E informacion aki a wordo conoci den un comunicado pa e Sub-secretario di Telecomunicacion di Chile.
“Starlink a wordo diseña pa comunidadnan aisla como esun di Caleta Sierra y Sotomo” Gwyne Shotwell, presidente y director di operacion di SpaceX, a bisa den un comunicado. Caleta Sierra ta un localidad chikito ubica na Region di Coquimbo. Mas di 400 kilometer na nort di Santiago, na unda ta biba cerca di 170 persona cu e mayoria ta dedica pa piscamento artesanal, diving y saca yerba di lama na e costa di Ocean Pacifico. Di su parti, Sotomo ta un pueblo cu un centenar di habitante ubica na 950 kilometer na sur di Santiago, cerca di e riu Puelo y pa e cual por yega solamente via e riu.
Pa haci e conexion, e compania a entrega kit satelital cu lo duna servicio gratis durante un aña. Despues di e tempo aki, a acorda cu e municipio lo paga e servicio.
“Varios biaha nos geografia ta haci cu e despliegue di red tradicional banda hancha ta bira compleho. Ta p’esey cu nos ta yena di orguyo cu empresa Starlink a eligi Chile como pais pionero di Latino America pa cuminsa cu e despliegue di nan proyecto di internet satelital, Gloria Hutt minister di Transporte y Telecomunicacion di Chile a bisa.
Diaranson ultimo na Barcelona, Musk a manifesta cu lo inverti hasta 30.000 miyon dollar den e proyecto Starlink, cu ya tin mas di 1.500 satelite, na un dozijn di pais, cu mas di 69.000 usuario activo.
