E posibel sustituto di Michelle Bachelet por ta e representante di derecha, Sebastian Piñera of un candidato di izquierda cu lo purba uni hende pa competi contra ex-presidente Piñera. E pueblo Chileno lo participa den eleccion diadomingo proximo, pa asina eligi e futuro presidente di Chile.

Chile lo por experimenta un deja-vu si Piñera, di 67 aña, confirma su bentaha den tur encuesta (34,5%) pasobra lo ta Michelle Bachelet atrobe cu ta traspasa poder na Piñera, manera a sucede na su prome mandato na 2010. Chile lo por suma su mes na pais manera Argentina, Peru y Brasil, cu tin gobierno di centro derecha.

“Nos lo cambia Chile den un pais desaroya den 8 aña,” Piñera a splica. E tin un fortuna di 2.700 miyon dollar, segun revista Forbes. Durante e presentacion di su gobierno hopi hende a duna nan apoyo na Piñera y nan ta spera un gobierno nobo, despues di 4 aña caminda Bachelet a lansa hopi cambio den e sistema politico na Chile.

“Desaroyo”

Durante e discurso di Piñera e palabra clave ta desaroyo, y pa su rival Alejandro Guillier, di partido independiente, e clave ta e defensa di tur reforma cu Bachelet a inicia.

Guillier tin 64 aña, y e tin 15,4% di intencion di voto, pa tal motibo e sa cu su oportunidad lo ta pa e di dos buelta, cu ta planifica pa dia 17 di december.

“Nos lo participa na e prome buelta manera un eleccion primario di e partido progresista, pero ami ta kere cu e mayoria di ciudadano lo reagrupa pa di dos buelta y lo cuminsa e competencia entre derecha y izquierda,” el a bisa durante un entrevista.

Candidato vs poco apoyo popular

Bachelet a presenta un plan di reforma, entre nan e reforma educativo, caminda el a instala un sistema progresivo gratis di educacion superior. El a aproba e union civil, cu ta beneficia pareha homosexual y el a aproba e aborto terapeutico tambe.

E proximo presidente cu lo yega dia 11 di maart na La Moneda, lo haya un pais cu un economia halto, cu a ser impulsa pa e prijs di koper cu a lanta e crecemento promedio di 1.8%. Chile ta e principal productor di e metal cora.

Situacion economico y e caso di corupcion cu a envolve e yiu di Bachelet y casa di su yiu na cuminsamento di su di dos periodo di mandato, a mata e popularidad di presidente Bachelet. Bachelet ta e ultimo representante di un epoca dorado di muhe den poder na America Latino.