“Personahe ehecutivo grandi, politico, studiante y ciudadano simpel ta den nos mira. E explosion lo avisa. Nos ta leu caba, scondi, y preparando e proximo,” e teroristanan a adverti den un comunicado.
Den e escrito nan a sigura cu nan artefactonan chikito a causa un teror enorme y tabatin un repercusion mediatico grandi.
“Cu esaki sirbi di experiencia pa esunnan cu tin gana di desaster: cu poco ta haci hopi,” nan a sigura.
E agrupacion denomina eco-terorista Individualista Tendiendo a lo Salvaje (ITS), a referi na e explosion registra diabierna pasa na un parada di bus, y nan a anuncia ‘nan plannan pa futuro’.
“Nos a tuma e responsabilidad absoluto pa bandona nos regalo explosivo na un parada di Transantiago (sistema di bus) den centro di e capital,” nan a expresa.
Ademas, nan a señala cu nan menasa ta manera un bacteria cu ta opera na nivel internacional, cu complicenan na Mexico, Argentina, Brasil, Escocia, Spaña y Grecia.
Presidente di Chile, Sebastian Piñera, a condena e explosion cu a laga cinco persona herida, un di nan grave, y a anuncia un demanda contra esun cu resulta culpabel di e atentado cu a provoca desconcierto den e poblacion.
Di su parti, ministro di Interior y Siguridad, Andres Chadwick, a bisa na periodista cu ‘e tipo di accion aki ta inaceptabel’.
E ministro a anuncia cu el a acorda cu fiscal Guzman di ‘duplica e ekiponan’ di investigacion pa aclara e suceso mas pronto posibel.
Chadwick tambe a haci un yamada na trankilidad di e ciudadania, cu e eventualidad aki di menasanan nobo di otro artefacto explosivo na e capital Chileno.
El a sigura cu e cuerpo di Carabinero a desplega un vigilancia mayor na e region metropolitano di Santiago, di 7,2 miyon habitante.
