E Grupo di Lima a haci un yamado pa aislamento di gobierno di presidente Venezolano, Nicolas Maduro, durante un reunion celebra cu representantenan di paisnan miembro di e grupo aki na Santiago, e capital Chileno.
Ora e cumbre di canciyernan a finalisa, e organismo a emiti un comunicado na fabor di e reestablecemento di democracia den teritorio Venezolano, a traves di e respaldo di e opositor Juan Guaidó, cu a ser comparti na Twitter pa e canciyeria di Chile.
E diputado di oposicion Julio Borges, ken a asisti na e reunion representando Venezuela, a sigura riba rednan social cu e cita a sirbi pa defini un ‘firme condena’ pa esunnan cu ta duna apoyo na Maduro.
E declaracion conhunto di e grupo ta consisti di 17 punto, y ta referi pa e Secretario General di Nacionnan Uni, e Asamblea General y Conseho di Siguridad, pa tuma medidanan pa evita e daño di siguridad na Venezuela y brinda un ‘asistencia humanitario urgente pa e poblacion’.
Pero den e jornada aki, ademas di e condena, cual nan ta describi como un ‘violacion sistematico di e Derechonan Humano’ di parti di e Administracion di Maduro, e nacionnan cu ta forma parti di e organisacion a critica Cuba, China, Rusia y Turkia pa respalda Maduro, como cu ta considera cu esaki ta genera un ‘impacto negativo’ riba e panorama regional.
A inclui un peticion special den e declaracion. Ta trata di un yamada di reconocemento na esunnan cu a ser nombra pa e lider opositor, Juan Guaidó, y pa e Asamblea Nacional como delegado ‘legitimo’ di e pais petrolero.
