E diagnostico comparti dialuna pasa den e comite politico amplia di La Moneda tabata cu gobierno a logra evita un crisis humanitario na e frontera nort di e pais, pero ainda ta existi varios aspecto pa aborda pa contene e cantidad grandi di migrantenan Venezolano cu lo por yega na Chile den corto plaso.
Asina a comenta e distinto dirigente cu a participa den e instancia, den cual Minister di Interior, Andrés Chadwick, a referi pa e situacion cu a genera den ultimo dianan na e paso di frontera di Chacalluta y Pisiga-Colchane, cu tabata collapsa pa e yegada di centenares di migrante cu tabata busca drenta teritorio Chileno.
Oranan despues, secretario di Estado a papia di e tema aki den e Comision di Derechonan Humano di e Senado, unda el a sigura cu e proyeccion di gobierno ta cu 300 mil Venezolano lo por busca establece na Chile.
Tocante esaki, el a detaya cu segun datonan di Organisacion Internacional di Migracion y di Organisacion di Estadonan Americano (OEA), ‘ta spera un exodo di Venezuela entre 4 pa 5 miyon di ciudadano den e proximo lunanan, di cual ta calcula cu 300 mil tin e intencion di yega na Chile’.
Di acuerdo cu fuentenan di Interior, e cifra ey ta coresponde na e proyeccion cu e cartera ta realisando, tumando na cuenta e fluho migratorio den ultimo añanan y e escenario politico, economico y social cu ta afecta e pais Caribeño actualmente. Esaki, mas e condicion cu a genera e solicitud di visa di responsabilidad democratico di banda di e Venezolanonan pa nan por drenta Chile.
