Fiscalia Nacional di Chile ayera diabierna a confirma cu ta investiga 5.558 denuncia di ciudadano, cu segun nan, a sufri di violacion di derechonan humano durante e protestanan cu e pais ta biba, cu a laga por lo menos 27 morto den mas di 100 dia desde cu e explosion social a cuminsa.
E cifranan ta abarca desde cu e protestanan a cuminsa, dia 18 di october di 2019, y 30 di november di e aña ey, nan ta conta 4.525 victima homber y 1.031 muhe. Den termino di edad, 4.719 tabata adulto y 834 ta menor di edad. Di algun personanan, nan no sa ni su sexo ni su edad.
E informe publica pa Ministerio Publico ademas a agrega cu di e mas di 5.000 victima, 4.170 a acusa cuerpo policial Carabinero como culpabel di violencia institucional.
Di loke ta trata e resto di institucionnan di siguridad di Estado, Ehercito ta suma 244 denuncia, Polis di Investigacion (PDI) 96 y otro 27 denuncia ta punta pa funcionarionan di Armada.
Den total, actualmente tin 38 agente di Estado formalisa pa un of mas delito.
Ministerio Publico a indica den su reporte cu ta investiga 31 fayecido den protestanan, entre e comienso di october y 28 di januari pasa, y den cuatro caso e morto ta atribui presuntamente pa agentenan di Estado.
Otro dos caso ta investiga pa via di fayecimento mientras nan tabata bou custodia policial di comisaria.
Relaciona cu e causa di denuncia, 21 di e victimanan a acusa di discriminacion pa motibo di pertenece pa grupo di diversidad sexual, 19 pa ta identifica como miembronan di e pueblo originario mapuche, 75 di e afectado ta personanan stranhero, den su mayoria ciudadano Colombiano, Peruano y Venezolano.
