Dos persona a fayece y un di a keda herida, pa via di candela di mondi na e region di Araucania na Chile, autoridadnan a bisa ayera, entre di un ola di calor cu a aumenta e temperatura na nivel record di e zona centro y sur di e pais Suramericano.
E candela di mondi, cu ta registra pa cada biaha cu frecuencia mayor durante e berano austral, a consumi casi 17.000 hectarnan den temporada aki na Chile, di acuerdo cu loke agencianan di gobierno a bisa.
Dos hende grandi a fayece y un bombero a sufri herida grave pa via di un di e 25 foco activo na Araucania, situa na 700 kilometer na e sur di e capital, e autoridad maximo di e region, Jorge Atton a afirma pa periodistanan.
Na nivel nacional, autoridadnan di emergencia a reporta 40 kimamento activo, cu den su mayoria a ser provoca pa hendenan. Un 2.500 brigadista di e agencia forestal CONAF y miembronan di Ehercito a ser desplega pa combati e candela, cu segun funcionarionan, te ainda no a pone den riesgo e area urbano.
Centro y sur di Chile ta atravesa un ola di calor cu a aumenta e temperatura te nivelnan maximo historico. E luna pasa, e Region Metropolitano a anota un record di casi 40 grado Celsius.
