(Infobae) – E candidato comunista pa presidencia di Chile, Daniel Jadue, a duna di conoce den un debate di diadomingo ultimo su idea di legalisa e droganan duro na su pais pa enfrenta miho e comercio ilegal di e substancianan aki.
Asina Badue a bisa den un debate di television cu a reuni dos pre-candidato presidencial di coalicion iskierdista, Apruebo Dignidad, ken ta proximo pa competi den eleccionnan primario cu lo tuma luga e proximo 18 di juli na Chile. Den oportunidad aki, Jadue a debati hunto cu su par Gabriel Boric di partido Convergencia Social.
Den memey di e debate, e candidato comunista a wordo consulta si el a pensa of tabata dispuesto pa legalisa droganan como cocaina of pasta y Jadue a contesta cu “den un fase posterior si, y cu un entrega regular pa adictonan desde e aparato di Estado di tal manera cu por anticipa e consumidor conflictivo, pero ademas ocupa e placa cu awe ta tira den e guera contra narcotrafico cu ta un guera fracasa, cu ta bay haci 50 aña”.
Ademas, el a enfatisa cu e placa cu ta inverti den e lucha contra narcotrafico lo a mester wordo destina na otro tipo di area, y cu despenalisacion lo mester ta “di manera gradual”.
“A mi ta prefera cu e placa ey bay na prevencion, pa mas desaroyo di cultura, di artenan, di deportenan y pa rehabilitacion cu ta loke nunca a wordo haci den e pais aki”, Jadue a sigura.
E palabranan di e candidato comunista a genera controversia y dialuna ultimo Jadue a purba di aclaria su postura pa loke ta trata droganan.
El a bisa “awor cu e berdad ta cu esun di dos cu ta e pasta no ta considera den e legalisacion gradual pasobra mas cu un droga ta un desperdicio, cu con implementacion di nos programa lo laga di existi”, den tanto, cocaina, si lo wordo considera.
