E Camara di Diputado di Chile a aproba diamars pasa un proyecto di ley cu ta establece e obligacion di tur e autoridadnan religioso di denuncia na e Husticia civil cualkier delito contra mucha menor di edad of adulto vulnerabel, despues di e casonan di abuso sexual cu a ser scondi den Iglesia Catolico.
E determinacion di congreso lo tin cu ratifica na Senado na e di dos proceso legislativo, prome di manda pa e Ehecutivo pa su promulgacion como ley.
E perfeccionamento legal aki a pasa pa votacion, despues di varios aña di denuncia contra persona cu tin relacion cu e religiosonan Chileno, pa abuso sexual di mucha menor di edad y adulto, cu nunca a yega den man di husticia civil.
E proyecto aki ta busca amplia e spectrum di personanan cu tin obligacion pa denuncia delito ora ta referi pa hecho ilicito ‘cu a ser cometi contra mucha muhe of mucha homber y adulto cu pa motibo di su condicion fisico of mental ta rekeri di proteccion special’.
Den e sentido ey, e obligacion tambe a ser amplia pa directiva di asociacion, fundacion of agrupacion di caracter cultural, hubenil, educativo, deportivo of otro.
E proyecto, cu a ser aproba unanimamente na e votacion general, ademas ta determina cu ora esaki no lo ta cumpli cu e normativa, e personanan responsabel cu no a haci e denuncia lo por ricibi e castigo cu e legislacion ta establece pa e persona cu ta cubri e delito y cu e denuncia no a ser haci.
