Sr. Friedrich van der Hans, mihor conoci como “Chibi” no ta un persona desconoci. Un persona cu semper t’ey den tur evento di Carnaval pa saca potret y traha recuerdonan y pone esakinan den e revista Carnavalesco, Bacchannal. Den un entrevista cu Bon Dia Aruba e ta conta Aruba e historia di e comienso di e revista Bacchanal te na su ultimo proyecto.

Chibi ta conta cu for di chikito su mama tabata cose costume di Carnaval pe y su rumannan y asina el a experiencia Carnaval for di chikito. Su pasion sinembargo no ta mucho Carnaval sino arte y deporte. For di chikito semper e tabata gusta pinta y despues cu 12 aña el a cuminsa practica e deporte di Judo.

Ora cu e tabata den basisschool su amor pa pintamento tabata yudele compronde e lesnan, pero ora cu el a yega Colegio Arubano e materianan a bisa mas dificil pa e compronde y dificil pa traduci den pintamento.

Mi a cera mi mes den mi mundo di pintamento y mi a cuminsa train Judo mesun aña cu mi a bay brugklas di Colegio Arubano. Tur dia despues di scol mi tabata cana bay cerca caminda tabatin un lugar di print T-shirt y mi tabata sinta pinta pa un par di ora pa despues core bay cas busca mi paña pa bay train Judo.

Chibi a sigui conta cu despues di kita for di scol cu 18 aña, el a haya un trabou na e mesun luga di print pintando design pa T-shirt, pero despues a realisa cu e tin falta di mas educacion. Asina despues di algun aña el a haya e curashi pa bay bek Colegio, studia tur dia den bibliotheek sin pintamento tampoco Judo y caba avond-HAVO den dos aña.

Despues di caba avond-HAVO Chibi a bay studia Bestuurskunde na UNA, Corsou, pero a faya den e aña ey y despues a bay Hulanda pa studia H.E.A.O. den e richting di Bedrijfsinformatica na Groningen. Durante aña ey el a ripara cu e ta bay faya atrobe y a dicidi di sigui haci locual semper el a gusta y el a join un team di Judo cu yama De Mattekloppers y a aplica tambe na e Kunstacademie Minerva wardando riba e siguiente aña escolar.

“Mi a scoge creatividad pasobra mi tabata pinta hopi prome cu mi a cuminsa Judo. Pero Kunstacademie Minerva a nenga mi pa motibo cu mi no tabatin un portfolio. Mi no tabata sa kico ta un portfolio cu mi dibuhonan (trabounan) di antes. Tur esakinan a perde of benta afo pasobra cu nan no tabata cosnan considera importante,” el a conta.

Despues el a aplica na lerarenopleiding Ubbo Emmius pa e materianan tekenen y handvaardigheid. “Porfin mi tabata studia algo cu mi tabata kier y gusta. Na fin di aña escolar mi a bolbe bay aplica na Minerva cu mi portfolio yen di trabou y nan a tuma mi,” el a resalta.

Chibi a conta cu den su ultimo aña pa su proyecto final el a scoge e tema di Aruba su Carnaval. Su inspiracion pa e proyecto aki tabata cu Aruba su Carnaval nunca a conoce un estilo di cas (huisstijl), den otro palabra un diseño of locual mas hende conoce como branding. El a gradua na Kunstacademie Minerva cu e branding pa Aruba su Carnaval como un Graphic Designer y Photographer.

Na 1996 el a bolbe bek na Aruba pa Carnaval 42 y na 1997 el a haci un exposicion Bacchanal 1997 pa presenta su ideanan pa branding di Carnaval. Pero pronto el a realisa cu tabatin mucho necesidad pa informacion di Carnaval den forma di documentacion y asina el a cuminsa documenta Carnaval por medio di un revista Bacchanal desde 11 di November, 1998. Na 2014 Bacchanal a lansa un website arubabacchanal.com pa Carnaval 60 cu a duna oportunidad tambe pa comparti mas potret- y informacion cu a ser acumula durante añanan cubriendo Carnaval.

El a cuminsa conta cu na 2015 el a cuminsa traha mas serio riba un buki cu semper tabata un di su metanan. El a tuma Carnaval 50 na 2004 te cu Carnaval 54 na 2008 como punto di salida. Un bista completo riba cinco aña di Carnaval den un Volume One.

E intencion tabata pa publica na 2019 (Carnaval 65), pero sinembargo a bin cambio den e plannan. Personanan cu mas conocemento den e area di documentacion y herencia cultural di Aruba na bibliotheek y universidad a convence mi pa agrega mas na e investigacion.

“Basicamente un persona cu studia e publicacion aki lo por compronde kico ta Carnaval, di unda Carnaval a bin, con Carnaval a yega Aruba y con esaki a desaroya akinan na Aruba. Historia di Aruba su Carnaval y cu un meta pa preservacion di Aruba su Herencia Cultural,” el a indica.

Chibi a splica cu na 2018 durante tur e trabou riba e publicacion el a haya su mes sinta na mesa cu CR38TE, un team di website developers. Nan a presente e oportunidad pa hunto logra traha un Carnival online platform manera cu semper e tabata kier. Un oportunidad cu e no por laga pasa y na december 2018 nan a logra launch www.arubabacchanal.com pa Carnaval 65 na 2019 hunto cu e delaster edicion di e revista Bacchanal.

“E plataforma online arubabacchanal.com a prueba su mes y pa Carnaval 66 na 2020 a logra mas advertising y mi publicacion tabata mas leu cu confiansa den e estudio cu tabata bayendo bon. Diripiente net despues di Carnaval 66 na 2020 Aruba a ser confronta cu e menasa grandi di un pandemia Covid 19. Mi a purba di mantene arubabacchanal.com activo pa 2021 a pesar cu no tabatin actividadnan di Carnaval manera semper. Pero cu bista riba un 2022 sin Carnaval mi mester a pone arubabacchanal.com on hold,” Chibi a indica.

Durante temporada di Covid-19 e tabatin e tempo pa concentra completamente riba su publicacion, e proyecto LAB_Volume One.

Na 2022 a anuncia cu Aruba su Carnaval 2023 lo continua. Su proyecto LAB_Volume One tabata den su fase final di ultimo coreccionnan. Chibi tabatin e ambicion pa publica e mesun 11 di November, 2022, pero e gastonan di imprenta den e oferta na final di augustus 2022 a resulta den mas cu dobel di e oferta di 2018.

Chibi a sigui conta cu e mester a cambia su plannan y tabata hopi preocupa pero determina pa continua cu e proyecto. LAB_Volume One a termina di ta un producto grandi y ambicioso y e paso financiero pa caba di realisa e proyecto tabata uno asina grandi cu e tabata crea duda den hende cu hopi experiencia riba e tereno di publicacionnan.

El splica cu Sr. Gregory Richardson Phd a consehele pa aplica na Mondriaan Fonds di Hulanda pa subsidio. Mondriaan Fonds ta un di e seis fondonan di Reino Hulandes cu ta pone fondonan disponibel pa proyectonan cultural. Riba 21 di September, 2023 Chibi a ricibi un contesta positivo di Mondriaan Fonds pa un contribucion financiero bastante grandi y asina convence e otro fondonan Unoca y PBCCG pa tambe confirma nan contribucion.

Asina el a logra manda su publicacion LAB_Volume One (Aruba’s Carnival History with a case study of 2004-2008) bay print. LAB ta afkorting pa Liber Amicis Bacchanalibus (A book for Bacchanalian friends).

Por ultimo Chibi ta gradici un y tur cu a kere y cu a contribui na haci e proyecto LAB_Volume One un realidad pa Aruba.