E team di prevencion di desaster cu prome minister Mike Eman na cabes a informa cu tin indicacion cu e derame lo yega parti di west di nos isla pa motibo di cambio di coriente.
E ta bisa cu nan a tuma medidanan di prevencion pa asina nan ta prepara ora e azeta lo yega parti west. E ta un area hopi sensitivo tambe, segun e mandatario.
Ayera nochi nan a informa prensa di e ultimo desaroyonan riba e di dos dia cu e azeta di Trinidad den forma di tarballs y patches a yega nos costanan. Te awor e costanan di noord ta afecta y den menos forma oost, na costa di Santana di Cacho.
Segun e prome minister tin noticia positivo como cu e teamnan di limpiesa na costa di Boca Prins ta notifica cu nan ta haya menos contaminacion. E team di prevencion di desaster hunto cu Aruba Birdlife Conservation a bay inspecciona e islanan na Baby Beach y refineria unda e parhanan ta broei na e momento aki. Tin un gran cantidad di parha awor y den e caso cu algo lo pasa, esaki tin un impacto grandi, segun presidente Greg Peterson di e fundacion.
Sinembargo durante e control nan no mira niun contaminacion te awor. E fundacion tampoco a haya otro notificacionnan di parhanan den problema, solamente nan a mira un potret riba social media di un parha afecta.
Yamada pa boluntarionan meld mañan
Te awor tin 77 boluntario registra y ainda tin mas. Pa structura esaki y hende lo haya instruccion con anda cu e azeta y mester bisti pa nan proteccion, Rino Hermans di Oficina di Prevencion di Desaster ta informa cu nan ta pidi pa e boluntarionan meld awe mainta na oficina di DOW (mas o menos 8or). Eynan lo ricibi instruccionnan.
