For di dia 30 di maart ultimo, chefnan di marinierskazerne Savaneta ta preparando 200 lunch. Nan lo haci esaki pa un siman den colaboracion cu Fundacion Pa Nos Comunidad Aruba (FPNC) y CEDE (Centro pa Desaroyo).
Personal di cushina di marinierskazerne ta prepara e cuminda, cu despues ta ser transporta pa Anaconda na FPNC. Container special di transporte ta tene e cuminda cayente. Boluntarionan na e banco di cuminda ta distribui e lunch den paki conveniente di take away.
E preparacion y transporte di 200 lunch ta posibel danki na e medidanan preventivo di propio cuarentena di mariniernan. Mariniernan Real Hulandes tabata na Merca pa proposito di training cu marinier Mericano, pero mester a retira prematuramente pa motibo di pandemia di coronavirus. Ya cu e mariniernan no ta trahando na e base, y pues no lo come eynan, e capacidad di cushina di e base lo ser usa te cu dia 5 di april proximo den un manera diferente pero efectivo.
