Ever de Peña, un chef profesional di apenas 36 aña di edad, ta preparando pa habri su mesun restaurant pronto. Despues di un trayectoria largo, diferente experiencia y competencia, Ever ta cla pa conta un storia a traves di su cuminda. Den un entrevista cu Bon Dia Aruba Ever a conta con el a encontra su pasion pa cushina y con el a yega na e decision di habri su mesun restaurant.

Ever ta conta cu el a cuminsa su estudio na EPB, despues di EPB el a sigui pa EPI y semper el a keda den e area di hospitality and tourism. Na EPI el caba su Associate Degree, cu ta tres aña, durante cual el a traha y bay scol. Su trabao tabata na Calypso Restaurante na hotel Casa del Mar.

Despues di Casa del Mar, Ever a cambia trabao y a bay Renaissance y mientras e tabata traha na Renaissance, a gradua for di EPI pa su Associate’s Degree como miho graduado y di eynan el a sigui haci tres aña mas cu e programa EAI na EPI mes, cu ta un nivel mas halto.

El a sigui conta cu despues cu el a cambia di trabao y a sali for di Renaissance, el a bay Cooks Restaurant na Playa y mientras e tabata haci traha eynan, e tabata representa Aruba afo como studiante, na diferente luga manera California, Italia entre otro.

Durante su trabao na Cooks Restaurant, Ever a competi y a gana un culinary competition di EPI mes. Unabes cu el a gradua di EPI el a bay traha na Manchebo Hotel na unda el a cuminsa como Sous Chef y despues di dos aña el a wordo promovi pa Executive Chef, e Executive Chef mas jong na Aruba.

Na aña 2016 Ever a competi pa e titulo di Iron Chef na Aruba contra chefnan di Marriott y Ritz Carlton. Durante e competencia, el a sigui conta, el a cera conoci cu e chef di Marriott y a cera un bon amistad cune y despues di un tempo e chef aki a ofrece trabao como Executive Sous Chef na Marriott y asina el a laga Manchebo y a bay traha na Marriott na 2016.

“E bon di Marriott ta cu tur aña mi tabata biaha dos biaha pa aña y nos tabata trece chef di afo. Mientras mi a traha na Manchebo tambe mi a biaha algun biaha pa representa e hotel,” el a bisa.

Cuater aña pasa Ever su ex-hefe na Marriott a bay laga Marriott y habri su mesun restaurant y dos aña pasa el a ofrece Ever e oportunidad pa habri un restaurant cune. “Mi a keda pens’e y mi ta kere cu aworaki ta e momento corecto pa hacie y mi ta trahando riba esey aworaki,” Ever a indica.

Ever a conta cu no semper e tabatin un pasion pa cushina. Su amor pa cushina a crece durante añanan cu e por a experiencia kico en realidad un chef su trabao ta.

“Mi ta corda ora mi tabata bay scol cu mi a cuminsa na EPI mi tabata bisa mi mentor cu mi ta djis haci e programa, haya mi diploma y despues mi ta bay afo of mi lo keda ‘kinan y bira manager na hotel. Pero ora cu mi tabata trahando den cushina y mi a wak e rol di un chef mes, mi a namora di esey. Un cos a hiba na otro y mi a namora y mi ta kere no tin nada otro cu mi por stima mas cu cushina,” el a expresa.

El a remarca, cu aunke e no tin un cuminda faborito specifico, e gusta traha cu seafood, pisca, mas cu otro tipo di cuminda. “Mi ta kere bo por haci hopi mas cos cu pisca cu loke bo por haci cu carni. Mi no tin algo specifico cu ta mi faborito, pero mi gusta traha cu bon producto y purba saca lo miho di nan,” el a bisa.

Pa loke ta su experiencia durante e diferente competencia cu el a yega di participa aden, Ever ta conta cu e tabata un bon experiencia pe y e ta haya jammer cu no tin, pa mas cu cinco aña caba, competencia di cushina mas na Aruba.

“Mi ta kere e ta algo bon pa haci como chef y como studiante bo ta siña hopi. E mundo di cushina por ta hopi stressful y mi ta kere un competencia ta yuda bo calma bo mes. Ami a competi cuater biaha y semper e tabata un bon experiencia, no paso mi a gana, pero overal e ta un bon experiencia,” el a indica.

Tocante su restaurant nobo cu lo habri proximamente, Ever ta conta cu e lo ta un luga chikito cu lo tin 16 luga di sinta, por tuma 24 hende pero na e bar mes ta 16 asiento tin. El a splica cu e motibo pakico e ta bin cu un concepto asina ta pasobra su style di cushina ta e ta conta un storia a traves di su cuminda.

“Mi ta kere cu e concepto aki mi por tin 16 hende contento henter e anochi. E ta un espacio cu mi por expresa mi mes a traves di e cuminda,” el a agrega.

Por ultimo, Ever ta manda su mensahe pa comunidad, specialmente pa e hobennan cu ta buscando ainda nan pasion den bida. “Mi mensahe ta cu sin importa loke bo haci, haciele cu pasion. Mi ta corda mi mama a yega di bisa mi no ta nada si ta bari bo ta bay bari, of kico cu ta, djis hacie manera cu bo ta stima loke bo ta haci. Esey ta mi conseho, loke cu bo haci, hacie cu pasion.”