Colegio EPI sector Horeca a tene nan examen final pa alumno di ultimo aña cu lo obtene nan ‘Associate Degree of Applied Science in Culinary Arts’. Den esaki, tur alumno mester pone den practica un buffet basa riba locual nan a siña durante nan tres aña di estudio.

Alvin Leest, docente di cushina, tin 14 aña dunando les na EPI Horeca. El a splica cu cada alumno mester a prepara cuminda pa 200 persona cu lo atende pa nan buffet di examen final. “Nan tin cu traha henter e parti friu di cuminda, arte di manteca, arte di escultura di fruta”, e ta splica

Un examen final cu tur mucha cu ta cabando e estudio di cushina tin cu haci, como tambe e parti di berdura, salada, tur e snacknan friu, ‘manera e webo yena cu ta cay den examen y con ta atende cune’. E examen ta parti e alumnonan den dos grupo, den cual 7 studiante ta haci examen un siman y e otro 14 ta haci nan presentacion.

Situacion actual di estudio di arte culinario.
A puntra Leest si tin interes den estudio pa e arte di cushina. E ta bisa locual ta e problema den estudio ta cu esunnan cu caba no ta haya trabou facilmente y pa e motibo ey manera nan caba MBO nan ta bay afo.

Leest ta expresa cu afo nan ta reconoce e studiante y tin mas chens pa crece. “Aki no tin, nan mester tin pasenshi y mustra cu nan por. Sinembargo den exterior nan ta tuma nan y duna e libertad pa expresa locual nan a siña.”

E ta comparti cu e parti ey ta tristo, mirando e mes como Arubiano, ‘mi kier keda traha na mi pais’. Pero esey no ta e caso y nan ta prefera pa demostra nan conocemento den exterior, en bes cu nan tin oportunidad di keda riba nan isla.

No ta e falta di oportunidad solamente ta e problema, pero tambe e parti di ‘cheap labor’ ta hunga un rol, segun Leest. E ta splica cu hende/ dunado di trabou no kier paga. “E studiante no ta algo asina simpel el a caba. Nan tin nan diploma MBO, nan merece nan respet.”

Sinembargo e ta enfatisa cu esey no kiermen e studiante ta yega pa bira un chef, e tin cu pasa door di cushina pa e tin mas conocemento, pero ‘mester duna nan un chens’. Leest ta bisa cu e tin studiante na Abu Dhabi, Hapon, Australia, Africa, Francia y Suisa. Tambe na Belgica tin dos, ‘si afo ta duna nan chens y paga nan, pakico Aruba no?’

“Mi kier un dia pa tur e muchanan aki por traha na Aruba. No mester busca hende di afo pa bin traha aki, sabiendo cu nos tin nos propio hende”, Leest a expresa.

Mester tin pasion den estudio di arte culinario.
Leest ta splica cu e studiantenan cu nan tin ta pa motibo cu nan tin pasion pa e estudio. Tin algun cu no ta logra caba cune y ta prefera di cay afo. “Pa cushina mester tin pasion, si no, e no ta bay.”

E ta comparti esaki mirando cu tur dia ta diferente y nunca sa kico ta warda pa un chef of e cliente cu su cuminda. Pa es motibo e ta bisa cu un hende mester gusta y tin pasion pa e estudio. E ta bisa cu esey ta experiencia cu nan tin y cu pa mayoria, pasion ta e motibo cu nan ta yega leu.

“Nos ta contento cu nos scol. Nos scol ta di gobierno y ken cu yuda nos haci e scol mas grandi, pa tin miho ekipo pa drecha e scol ta bon. Locual tin awo ta bon ekipa sigur, pero nos kier ta miho”, Leest a bisa.

Ashley Stomp, un studiante den examenklas trahando riba su fontein di chuculati, a splica cu su experiencia den cushina tabata na cas y kier a sigui crece den e arte culinario. El a cuminsa EPI despues bay stage, unda cu el a haya mas experiencia y el a gusta. Stomp ta bisa cu su siguiente stap ta pa bay Hulanda y sigui studia den e mesun area.