Siman pasa Bon Dia Aruba a sinta cu KPA pa dialoga riba e situacion di truck na Aruba y con algun chauffeur ta trece peliger den trafico door di core iresponsabel. Bon Dia Aruba a combersa cu algun chauffeur di truck pa scucha nan banda di medaya.
Nos a core rond un rato den un truck pa asina mira con nan ta core riba e caminda di Barcadera cual ta uno cu nan mester tuma tur dia. Siguramente awor e waf di container a bay di Playa pa Barcadera. Sinembargo e caminda ta den mal estado y ya pa basta tempo. Esaki ta un caminda cu mester wordo uza tur dia pasobra ta for di akinan e trucknan mester drenta y sali pa bay nan direccion y transporta nan carga. E caminda aki semper tabata fastioso pa core pero awor mas ainda.
‘Habri boca, perde trabou’
E chauffeurnan ta comenta cu nan no por para pa nan derecho pasobra esaki por costa nan trabao y ta pa e motibo aki nan ta dicidi di keda anonimo. Nan a purba di bin hunto pa lanta un sindicato pero no a logra cu esaki ainda. Nan no por keha tampoco por ehempel riba e holo di gas cu ta sali for di Eco Gas cual tambe ta stroba nan tur dia awo. Segun un chauffeur ta conta nos, varios chauffeur a yega di perde nan trabao caba door di a vocifera nan malcontento.
Un chauffeur ta conta Bon Dia Aruba cu e tin 21 aña ta core truck anto e ta hopi contento cu e waf a wordo muda na Barcadera, sin embargo e caretera eynan ta den asina un mal estado anto esaki ta birando demasiado fastioso. ”Nos mes mester cubri tur gasto ora cu un piesa di e truck mester kibra. E compania (priva) no ta yuda nos cu esaki. E cos aki ta un dolor di cabes tur dia pa transporta carga entre 20 pa 30 ton riba un caminda cu tin necesidad grandi di un renobacion y cual ta causando daño na varios truck.”
Renoba prome waf muda
Segun un chauffeur ta splica Bon Dia Aruba, gobierno a bisa cu e caretera na Barcadera mester a wordo renoba prome cu e waf a muda bay Barcadera. Esaki obviamente no a pasa anto e waf a muda cu ta algo positivo segun e chauffeur pasobra tin menos problema cu trafico ora di sali bay transporta carga anto no tin nada di keha di e waf nobo. Sinembargo, un problema a wordo reemplasa cu un otro pasobra e caminda cu nan mester uza tur dia awo ta hopi na werki y esaki ta trece yen desafio. Tairanan y diferente piesa caro sa kibra constantemente door cu e truck ta bati duro riba caminda cargando hopi peso.
Un cos cu ta wordo comenta ta cu ta pa motibo di e trucknan mes e careteranan ta den e condicion cu e ta. Un chauffeur ta comenta cu: ”Ta depende di e calidad di e caminda anto esaki ta berdad, trucknan ta trece daño na e camindanan despues di tempo. Trucknan ta core full rond di Aruba anto tur otro caminda cu kibra ta wordo drecha pues nan no mester castiga hende di e forma ey. Nos tur ta paga belasting aki bao pues djis paso truck ta kibr’e no kiermen cu no mester drech’e. Tin otro camindanan cu si ta wordo drecha mientras cu nan ta basta bon ainda, ta hopi caminda rond Aruba ta asina.”
Cooperacion den trafico
Un di e puntonan a bin pa dilanti tambe siman pasa tabata e velocidad halto anto coremento mey mey di caminda cu truck. No ta tur chauffeur ta core responsabel riba caminda anto esaki ta conta pa tur vehiculo, no solamente truck. E chauffeurnan ta enfatisa cu tur cos cu nos ta uza na Aruba ta wordo importa anto nan ta sinti cu nan trabao hopi biaha no ta wordo balora of respeta.
Hopi hende no ta tene cuenta cu e chauffeurnan di truck tin un trabao hopi duro coriendo cu un vehiculo bastante grandi riba camindanan cu no ta necesariamente den bon condicion, asina nos ta compronde for di nan comentarionan. E cooperacion den trafico mester bin for di ambos banda, nan ta haya. Un chauffeur ta bisa cu tin biaha mester core mey mey pasobra no tin otro modo di haci anto e caminda ta mucho chikito sin cu tin un otro caminda alternativo.
Riba nos pagina di Facebook ‘Bon Dia 24’, un persona cu nos ta asumi tambe ta un chauffeur di truck, ta comenta: ”Duna nos truck drivers mas respet. Tur hende tin mal custumber. Ademas, ta nos tin cu paga plachi di number tur aña di casi 2000 florin pa core riba caminda tur kibra anto daña nos trucknan. Haci un cambio! Nos ta traha duro den solo, sikiera apoya nos!”
Bon Dia Aruba a haya un reaccion for di departamento di DOW y lo bay sinta pronto cu director Marlon Croes y algun otro companianan di truck pa continua e combersacion
