Chauffeurnan di bus chikito a haya bishita di Parlamentario Mike Eman Diamars atardi cu a bin cu un proposicion cu e kier presenta na Gobierno pa cu un prijs preferencial pa esnan den transporte publico. Esaki ta den cuadro cu aumento di prijs di gasolin y diesel, cu ta bolbe conoce un cambio significante atrobe cu lo sigui impacta transporte publico.

Diamars atardi, reportero di Bon Dia Aruba a bolbe acerca algun chauffeur di bus chikito pa mira nan reaccion tocante e siguiente aumento den prijs di diesel y gasolin y con ta sigui cu nan. Bon Dia Aruba a bishita nan algun siman atras caba riba esaki. Na mes momento por a compronde cu parlamentario Mike Eman lo mester a bini pa presenta nan cu un proposicion cu e ta bay hiba Gobierno di Aruba.

 

E chauffeurnan di bus chikito no ta kere mucho mas den palabranan di politico, segun nan ta bisa Bon Dia Aruba, nan ta sinti manera cu loke Sr. Eman ta haciendo ta simplemente un ‘stunt politico’ pa sigui hunga cu nan sentimentonan. E parlamentario a presenta cu un carta unda ta describi tres punto pa gobierno asumi un responsabilidad pa crea un alivio cu reduccionnan di impuesto pa cu gasolin y diesel.

“Mi ta kere cu cada bes un politico bin cu un proposicion, sigur den e temponan aki cu promesanan ta wordo haci y no cumpli, cu hendenan por sinti esey. Pero mi ta kere e track-record di partido AVP ta bon y hopi ta pensa cu tin hopi promesa haci y no a wordo cumpli anto ta generalisa, cual ta comprendibel pasobra e decepcion ta grandi,” segun Sr. Eman. E ta sigui bisa cu pa su persona y partido AVP ta importante pa por sinti cu nan a asumi nan responsabilidad na un momento critico asina y sali para pa esnan cu ta sufriendo na e momentonan aki.

E parlamentario ta propone tres punto: Pa ministernan por informa si gobierno ta dispuesto pa habri e posibilidad pa esnan cu ta den transporte publico [Arubus, taxi, TO] por tuma gasolin/diesel na un prijs preferencial mas faborabel na Arubus. E siguiente punto ta pa ministernan por informa si gobierno ta dispuesto pa kita e BBO of reduci e BBO back na 3% pa gasolin/diesel, pa duna un alivio na henter e comunidad. Por ultimo, si ministernan por informa si gobierno ta dispuesto pa pone back e descuento di 10 cen riba accijns pa gasolin y diesel.

“Ta sumamente urgente pa haya un contesta di gobierno riba e preguntanan aki. Pueblo no por mas cu e aumentonan grandi di costo di bida y ainda tin mas medida na caminda,” segun Sr. Eman ta describi den su carta di preguntanan y sugerencia dirigi na Minister di Transporte y comunicacion y Minister di Finanzas y Cultura. Door di a redobla e BBO di 3% pa 6% y kita e descuento di 10 cen pa liter di gasolin y diesel, a haci cu e costo y aumentonan a bira mas severo cu nan ta caba y tur esaki ta pa motibo di decisionnan tuma pa Gabinete Wever Croes, segun Sr. Eman.

Chauffeurnan no por carga e peso mucho mas
 Marlene Maduro, chauffeur di bus chikito pa ruta di St. Cruz, tin 30 aña eherciendo e trabao aki. E ta bisa cu “nos actualmente no por carga esaki mas, e ta hopi pisa pa nos. Coleganan ta gritando pasobra e diesel ta hopi caro, nos ta pidiendo un aumento di tarifa cu por yuda nos.” Nan ta urgi pa un rebaho di nummerplaat tambe pa diesel, no ta di acuerdo cu e prijs cu tambe ta keda subi. Nan ta pidi pa hisa tarifa y pa Arubus tambe hisa tarifa.

Arubus ta haya subsidio, pero busnan chikito ta impuesto so nan ta haya, “gana 1 florin, kita 2 florin”, chauffeurnan ta expresa. Den ultimo 30 aña, tabata tin 1 florin so di aumento den tarifa. “Mi vergunning a tripel, tur cos a bira mas caro, gastonan a bira hopi halto, y no tin aumento den tarifa. Nos a pidi varios biaha pa peticion di nummerplaat sikiera mita nos ta keda un poco contento,” segun Sra. Maduro. Tin algun chauffeur cu a entrega vergunning of otronan cu no ta bin pasobra nan no por carga e peso mas.

Pa ruta di San Nicolas por ehempel, algun chauffeur mester traha mas cu 12 ora pasobra nan ta para cada biaha 2 ora pa warda nan turno. Por ta nan por tira tres pa cuater buelta pa San Nicolas.

“Nos mester solucion awor pasobra ora nos yega stacion di gasolin, un di e Toyota’ney ta 50 florin pa un kwart di diesel, anto bo no por traha e trabao aki cu un kwart, mester placa den man. Nan tin cu busca un manera pa yuda nos.”