Ayera mainta, un grupo di chauffeur di autobus chikito cu ta pertenece pa ruta di San Nicolas, a duna declaracion tocante e situacion cu ta sosodiendo awor cu otro chauffeurnan di e ruta di Noord y e preocupacion cu nan a presenta lunanan pasa pa Minister di transporte Chris Romero.

Lisette Winklaar, vocero di e grupo di San Nicolas a splica cu nan tin basta luna cu ta sinta cu Minister Chris Romero y te ainda nan no a haya niun contesta riba cierto punto cu nan a presenta.

El a expresa por ehempel e plachi number. Tocante esaki el a bisa cu e tempo di paga ta yegando y nan no tin contesta, pa motibo cu nan ta pagando 960 florin y tin otro cu ta paga 1.840 florin loke ta representa cu no tin un linea igual pa nan tur.

Tocante e situacion cu chauffeurnan di otro ruta, nan a declara cu esey ta un problema di tur dia cu nan ta bay ariba y ta regresa abou. Winklaar a informa cu nan a tuma e decision cu nan tambe ta bay duna e servicio di San Nicolas te hotel y esey a bira un problema entre nan.

Winklaar a contesta cu te ainda nan ta sigui haci esey, te ora cu nan haya un solucion y nan no lo duna tempo mas, sigui core e ruta te ora cu un grupo atenta cu otro cu ta haci mesun cos.

Luzaira Hous, kende tambe ta forma di e grupo aki, a trece dilanti cu ya nan a bay dilanti di Parlamento caba y Romero a pidi pa nan por pone tur nan punto riba papel. Despues nan a haya un reunion cune y nan a sinta pa splica tur punto, pa loke Romero a bisa cu mester duna tempo pa e por traha riba dje.

Di mesun manera, Hous a manifesta cu minister a bisa pa nan keda warda y duna mas tempo for di februari te na e momentonan cu segun Hous, nan no a haya ni un contesta, di ni un punto cu e grupo di chauffeurnan a duna pa Romero.

Ademas, Hous a duna di conoce cu nan tin coleganan di otro ruta cu ta drenta den nan ruta, e ruta di San Nicolas tin basta chauffeurnan y nan a pidi atencion riba esey. Tambe a expresa cu nan a pidi un baño cu a wordo construi caba, pero nan no por haci uzo di dje pa motibo cu ta paden di Carnival Village, un di e paradanan y nan no tin e yabi pa drenta.

Sonia Vrolijk, otro miembro di e grupo aki, a expresa cu antes e ruta di Noord no a core te hotel. E ruta di San Nicolas tabata baha cliente di playa y hotel. Loke a pasa cu e ruta di Noord ta cu e grupo a dañ’e segun e mes a sigura, pa motibo cu nan ta subi y baha cu otro ruta y nan kier haci ‘Fast Money’.

Tambe, Vrolijk a sigura cu nan ta core ruta segun e ley. Pa e motibo aki el a bisa cu ruta Noord a keda tira y p’esey piratanan a cuminsa. Pa finalisa loke nan ta pidi Gobierno ta pa pone atencion riba e puntonan cu nan entrega riba papel y a base di esey Gobierno por haci otro accion,locual ta kita un par di bus di ruta San Nicolas y manda nan pa ruta di Noord.

Ayera durante su conferencia di prensa, Romero no a duna comentario tocante e asunto di e chauffeurnan, bisando unicamente cu e lo consulta cu hurista prome, y despues lo informa prensa.