Chauffeurnan di autobus a ricibi un contesta for di gobierno dialuna por medio di un carta unda ta splica riba conseho cu nan a busca na Departamento di Transporte Publico y nan consideracionnan pa inicia proceso pa aumento di tarifa pa autobus. Por medio di e consideracionnan aki, gobierno ta haya cu tin base suficiente pa evalua un aumento di tarifa di autobus y ta compromete nan mes na inicia e proceso.

Manera cu Bon Dia Aruba a publica anteriormente, e Grupo di Autobus Uni a bini hunto siman pasa cu un marcha haciendo peticion na gobierno pa aumenta e tarifa pa autobus cu 1 florin inmediatamente.
Nan a haci un peticion pa ricibi un contesta for di gobierno riba Dialuna 18 di Juli 2022 no mas tarda cu 12or di merdia. Reportero di Bon Dia Aruba a remarca cu e dia di e manifestacion, e grupo di chauffeurnan cu a bini hunto a haci esaki den un forma pasivo, cual hasta tabata purba di calma otronan cu tabata hopi mas rabia. Por a scucha expresionnan di algun chauffeur cu lo por hasta a desea di blokia trafico y bay marcha sin asistencia di polis e dia ey. Sin embargo, esaki a toch bay den un manera ameno y pasivo pasobra e chauffeurnan tur tabata riba mesun liña pa tur cos bay debidamente y netjes. Di parti di Ministerio di Transporte a expresa palabra di elogio pa e forma structura y den orden cu e manifestacion a tuma lugar.

Gobierno ta pidi chauffeurnan di autobus pa ‘cool off’
 Riba e peticion ricibi, ministerio di transporte a pidi conseho na Departamento di Transporte Publico y bini cu algun consideracion. Cambio di tarifa di autobus ta mara na un cambio di e ley, pa ta specifico segun e carta di gobierno ta indica, ta Landsbesluit personenvervoer [AB 1997 GT 4]. Un cambio di e landsbesluit aki mester bay conseho consultativo [Raad van Advies] prome. ‘E problema di aumento di gasolin y diesel den e ultimo lunanan aki ta un situacion cu ta ser considera temporal,’ segun nan ta sigui indica den e carta. E ultimo biaha cu e tarifa di autobus a wordo adapta tabata na 2015, y salario minimo di usuarionan mas grandi di autobus en cambio a wordo adapta tanto na 2019 y 2020. E tendencia di e ultimo dianan, segun ministerio di transporte, ta indicando un rebaho di prijs di bari petrolero, y gobierno ta bisa di ‘considera na atende cu e problema y solucionnan structural cu tin preferencia riba solucionnan ad hoc di situacionnan temporal.’

Pues den e carta di contesta na e chauffeurnan, gobierno ta bisa cu tin suficiente base pa evalua un aumento di tarifa di autobus y ta inicia e proceso awor, cual ta algo cu por dura mas o menos 3 pa 4 luna. Minister Arends a declara por medio di e contesta aki na chauffeurnan cu lo mantene nan envolvi durante full e proceso manera cu e semper a bin ta haci. Motibo pa kico gobierno ta propone pa e chauffeurnan di autobus declara un periodo di ‘cool off’ manera nan ta describi den e carta, ta pa nan por haya espacio di cana e proceso legal debidamente.

Algun chauffeur kier cuminsa cobra aumento pa Augustus
 Loke reportero di Bon Dia Aruba a compronde for di algun di e chauffeurnan, cu tin papia cu sea nan haya contesta negativo of positivo for di gobierno, algun di nan lo cuminsa cobra e aumento toch per 1 Augustus. “Esaki no ta un proceso cu ta dura 3 pa 4 luna manera nan ta bisa, esey ta gañamento”, un chauffeur ta remarca na reportero di Bon Dia Aruba. Manera a publica caba, tin un estudio cu gobierno a manda haci hunto cu Universidad di Aruba riba e relacion entre aumento di tarifa di combustibel y ahustacion di tarifa pa transporte publico, cual ta premira di termina na September 2022. Ta di remarca cu chauffeurnan ta bisa cu te ainda ningun hende a bin cerca nan pa haci nan ningun tipo di pregunta riba nada. Nan ta haya ta hopi straño cu ningun chauffeur di autobus a wordo acerca ainda si nan ta haciendo un tipo di estudio asina, y awor lo bay haci dos luna un djis pa esaki ta cla.

E chauffeurnan ta analisando tur loke nan a haya contesta for di gobierno y lo ta formulando un reaccion oficial pa nan den e dianan venidero.