Chauffeur di autobus kier accion contra taxi pirata

Ta conoci cu rond di Aruba tin ‘taxi pirata’ operando. Nan ta promove nan servicionan riba medionan social. Di banda di chauffeurnan di Autobus tin desconento cu e mercado preto aki mirando cu esey ta afecta nan trabou.

Dos chauffeur a acerca Bon Dia pa duna nan keho mirando cu nan ruta di Oranjestad pa Noord, nan ta wak cu tin ‘taxi pirata’ ofreciendo nan servicio. Aparentemente nan sa para na e mesun luga caminda e autobusnan cu ta bay e mesun ruta ta parkeer.

Nan ta bisa cu e problema aki ta desaroyando pa mas cu 4 aña sin cu a tuma algun accion contra esaki. E chauffeurnan lo kier pa tin mas control mirando cu nan ta pensa cu e situacion ta saliendo for di man. Un di nan ta bisa cu e cantidad di pasaheronan a cuminsa baha y pa via di esey nan ta haya dificil pa nan por cera e dia. “Nos tambe tin nos debe pa paga”, e chauffeur a bisa.

E chauffeur ta bisa cu nan a cuminsa fada di e situacion. “Nos tin seguro pa paga pa cada pasahero. Nos tin debe di bus, banco y nos no ta yegando mirando tin persona ta prefera tuma e taxi pirata.”

Nan a pidi auxilio cerca Departamento di Transporte Publico, tambe minister encarga cu transporte, sinembargo nan a bisa nan cu taxi pirata no ta su cartera. Despues a acerca minister di husticia pa por yega na un solucion na e problema cu nan tin, pero tambe a wordo bisa cu no tin personal pero nan mester haci algo pa asina nan por haya boet.

E taxi ‘pirata’ sa haci su propaganda riba internet, mirando cu tin persona cu ta cuminsa comparti riba vraag &aanbod cu nan ta ofrece servicio pa busca hende, te cu ta busca mucha pa scol y hiba nan. E chauffeurnan di autobus ta expresa cu por ta hende cu no ta paga belasting y ta persona cu por cobra mas caro mirando cu mayoria ta baha nan dilanti nan cas.

Di nan banda ta bisa cu nan no por tuma ley den nan man, pasobra esey por perhudica nan permiso di core auto of nan lo por haya boet. Nan ta conta cu hasta ora nan yega di nan ruta nan sa wak un taxi pirata para riba nan luga di parkeer destina pa bus.

Nan a yega di mira situacionnan unda un colega chauffeur ta yega y pita, mientras ta mira cu e pasahero no kier warda mas y ta subi den auto di e taxi pirata. Nan ta bisa cu nan kier purba conscientisa pasahero pa no core cu taxi pirata pa via di e consecuencianan cu esey por trece cune.

Banda di esaki, otro problema cu nan ta confronta ta e parti di stagnacion di trafico. Nan ta bisa cu e rij ta bira largo y trafico ta keda pega. Pa e motibo aki e pasahero ta haya cu e autobus ta tarda pa yega. Kiermen ora nan frustra, nan ta haya mas facil subi e taxi pirata cu si ta yega na tempo y bay cu nan.

Pa nan, e ta cu nan situacion financiero ta keda bay atras. “Placa no ta yega pa fin di dia”, ta loke ta tende chauffeurnan ta bisa. “Nos tin nummerplaat, belasting pa paga y e ta halto. Nos tin cu haci’e tur luna. Sinembargo e taxi pirata no ta contribui, y tampoco ta haya sancion.”

Segun nan, e ta perhudicando nan trabou. Un otro aspecto cu mester considera, ta cu nan ta paga pa cada cabes cu ta subi den nan bus, esey no ta conta pa e taxi pirata. Nan no tin seguro, y nan number no ta na ordo. Tin caso cu ta bisa cu si tin accidente, e chauffeur mes ta bisa pa nan bay mirando cu no tin manera pa cubri nan.

Nan ta haya cu Cuerpo Policial mester cuminsa controla, y cu mester bin sancion contra personanan operando negoshi di transporte ilegalmente. Di e forma ey e taxi pirata lo pensa dos biaha ora e bolbe subi riba caya. Di e forma ey nan por wak cu ta bin solucion na nan problema.