Charlotte Lesire tin un pasion grandi pa yuda otro, un cualidad cu semper a destaca den su personalidad y aworaki como hoben adulto y dokter di profesion, e ta un caracteristica cu ta importante pa tene presente. Den un entrevista cu Bon Dia Aruba e ta conta di su infancia, su estudio y con su experiencia den deporte y baile a yud’e bira e persona cu e ta awe.

Charlotte ta conta cu su infancia tabata uno hopi dushi y bunita pa e recorda. E tabata pasa hopi tempo cu su ruman, cu su mayornan, biahando cu su famia y e tabata participa den diferente actividad manera zwemles, baile, les di musica como tambe canta den coro.

“Mirando back na mi infancia desde un punto di bista di mucha, mi ta mira momentonan inolvidabel yen di amor di famia. Y awor cu mi ta grandi mi ta wak e dedicacion di mi mayornan pa e desaroyo y crecemento di mi ruman y ami,” el a expresa.

El a sigui conta cu e tabata drenta hopi biaha Diana store cu su mama y semper e tabata pidi un doctor’s kit di mucha pa hunga cu su barbie. Di tempo e tabata chikito e tabata bisa tur hende cu e ta bay bira dokter. Despues, na momento cu e mester a yena tres opcion di estudio den V6, Charlotte a remarca, el a yena como prome escogencia geneeskunde y na e momento ey el a realisa cu ta un opcion so e tin. “Parti di mi personalidad ta cu mi ta enfoca mi mes hopi biaha den yuda otro. Mi tin cu bisa cu e amor pa mi prohimo ta uno grandi,” el a resalta.

Pa completa su pasion el a realisa e estudio di dokter na Costa Rica. Pa Charlotte esaki tabata un tempo di hopi conocemento y experiencia cu ta haci’e ken e ta awe como persona y profesional. Na 2014 el a cuminsa traha den sociaal geneeskunde (mediciana social). Awor, desde 2021 e ta traha na SVb como dokter di control.

“Mi ta stima mi trabou. Un dokter di control ta wordo mira hopi biaha como estricto. A pesar di mester aplica e leynan di seguro, mi ta mantene presente tur dia cu e persona sinta mi dilanti ta malo sea fisicamente of mentalmente. Como dokter y persona bo mester tin comprension y amor pa yuda un otro cu su preocupacionnan y necesidad medico. Na e mesun momento, bo ta keda humano y no ta tur biaha bo por yuda e persona cu locual e ta desea. A pesar di esaki e ta rewarding pa wak e aprecio cu e persona tin pa cu bo trato y guia,” Charlotte a destaca.

Su hobbynan ta lesa buki, haci deporte y baila. Esaki ta hobbynan cu desde chikito e ta practica y cu e ta disfruta te dia di awe. Desde chikito Charlotte su mama tabata conta nan storia prome cu drumi, y despues cu el a siña lesa e tabata bishita bibliotheek tur siman sin falta pa fia buki. “Un mente sin conocemento ta un mente bashi cu no por defende su mes,” el a enfatisa.

Pa Charlotte deporte ta importante pa mantene e curpa saludabel y na e momento, el a indica, e persona no ta sinti e impacto cu e tin pero mientras e añanan ta pasa, e compromiso y dedicacion lo demostra su recompensa.

El a cuminsa den e mundo di baile na Simadanza cu ballet, na edad di 3 aña. Despues el a cuminsa baila cu Kids and Youth in Action ora el a cumpli 5 aña. Na edad di 10 aña su mayornan a inscribi’e pa lesnan di folklore y el a continua esakinan te ora cu el a bay studia den exterior.

“Baile ta siña bo comparti cu otro, conoce otro su cualidadnan y tambe esnan menos bon. E ta yuda bo compronde e importancia di teamwork. Den baile mi a siña na un edad jong cu critica y coreccion, por ta algo bon. Juffrouw di baile ta duna bo un critica, cual como mucha bo ta siña tum’e como constructivo. Y esaki ta yuda bo coregi bo mes pa mehora un coreografia, postura of techniek pa duna e miho di bo mes,” el a subraya.

El a conta cu den su trabou diario e ta wak hopi hoben adulto cu dificultad pa desaroya mecanismonan di coping ora ta trata un critica of un ‘fracaso’ den bida. Y hopi biaha, el a señala, e tin di haber cu na mucha nan no a siña ricibi un critica constructivo.

“Baile ta yuda bo crea disciplina y compromiso cu bo mes y bo compañeronan di baile; The way you do one thing, is the way you do everything. Baile por mehora hopi cualidadnan riba otro terenonan di bo bida,” Charlotte a finalisa.