Mundo di arte manera actuacion ta keda crece den comunidad. Mas hoben ta keda bin dilanti cu kier purba diferente arte y kier sigui studia bay afo pa asina por bira mas conoci internacionalmente. 

Durante e presentacion cu Roberta Romelli duna na invitadonan, el a comparti cu Bon Dia Aruba con henter e proceso a bay prome cu el a biaha pa Hulanda pa asina haci su presentacion pa audiciona na academia di teatro na Maastricht.

For di Aruba el a contacta Angelo Tromp, kende ta un persona conoci den arte di Aruba y ta bibando actualmente na Hualnda. Romelli a puntra Tromp cua ta e miho academia di actuacion cu tin na Hulanda pa asina e por aplica na esaki.

Tromp a bis’e cu e miho ta Toneelacademie Maastricht Academy of Permoring Arts. Romelli a cuminsa busca tur informacion necesario online y cuminsa aplica di prome. Pa motibo di toelatingsexamen ta rekeri tempo, asina e pasa cu e prome audicion tabata na october.

Na october el a manda cu CV (curriculum vitae) di tur e trabou cu el a yega di realisa te cu actualidad cu tin den actuacion. Tambe e mester a manda un video di un minuut unda e ta actua un tiki di tur su rolnan cu tabata prome y tambe un essay unda e tin cu splica di punto di bista di publico e escena di un pelicula cu a impacta su persona.

“Esey tabata e tres rekisito cu mi tabatin, a base di esey ta na unda nan a selecciona cierto candidatonan y asina ami a keda aden pa invita pa asina por bay Maastricht. Mi ta un di persona cu a wordo selecciona y esey ta un privilegio pa mi”, Romelly a comparti.

Pa motibo cu e audicion tin un duracion di tres siman largo, den cada dia e mester a prepara algo den e actuacion di prome. Na e prome dia, e tin su ‘solo presentacion’ unda e ta bay presenta un monologo. El a scoge un obra di Antigona.

Un obra cu e ta bisa cu a yega di tin experiencia caba pasobra el actua cu Olga Gabrielle, kende tabata su director, despues di esey e tin su parti caminda e por haci su presentacion di Eve y e garden den Eden.

Apart di esey, Romelli tambe tin cu haci test di stem y con mester uza e stem den actuacion. Tambe e tin cu skirbi den otro papel caminda e ta wak e futuro y arte, tambe lo lesa un obra di Shakespeare.  E ta bisa cu improvisacion e tin cu keda bay traha riba dje, pasobra ‘e ta hopi trabou’.

Ora cu Romelli a haya e noticia cu e ta selecciona pa Maastricht, el a tuma e oportunidad y contacta Charles Croes, kende ta duna les di actuacion. E conhuntamente cu Croes a traha ‘dia y anochi’ pa asina keda cla y duna un bon presentacion.

Romelli ta agrega cu e tin experiencia den actuacion. El a sigui lesnan na Ateliers ’89, tambe cu Olga Gabrielle, kende tabata su director pa varios biaha y awo cu el a tuma les cu Charles Croes ‘cu a yuda mi masha hopi mes den esaki’.

Charles Croes a bisa cu Romelli ta un actriz cu a haya un oportunidad grandi na Hulanda. E ta bisa cu Romelli a acerca pa pidi yudansa asina e por prepara su mes. “Pa mi tabata un placer, mirando cu e tin un talento grandi.”

Croes a expresa cu a yega momento cu mester compronde cu na Aruba tin hopi talento cu no ta haya ayudo cu nan mester; ‘esey ta jammer pa motibo cu tin demasiado talento’. E no mester keda cu pa un so mester bay, pero cu mas por bay sigui nan soño.

Tambe a comparti cu el a mira Romelli crece manera persona den e proceso, anto esey ta importante p’e. “Mi ta contento cu e progreso y spera cu tur hende na Aruba por ta orguyoso di locual e ta bay haci. Si bo tin a talento y sinti manera bo kier haci’e, djis haci’e.”