Charlene Leslie ta un hoben di 28 aña di edad cu un meta pa un Aruba mas saludabel. Charlene ta un dietista profesional y recientemente a wordo certifica como un sport dietician tambe. E tin su propio consultorio, Alimenta Dietetics and Health Promotion, caminda e ta enfoca riba e promocion di un bida saludabel.
Charlene a termina HAVO na Aruba cu apenas 16 aña di edad y debi na su edad jong, Charlene a keda un aña mas na Aruba pa asina explora su opcionnan y dicidi kico lo bira e carera cu e lo kier sigui studia p’e. “Mi a haci staatsexamen Biologie VWO y mi a cuminsa cu M&O y Economie tambe pasobra mi no tabata precies kico mi kier a haci. Mi a pensa por ta algo den management, pero finalmente hopi lihe mi a realisa cu esey no ta pa mi”, e ta conta.
“Mi tabata sa cu mi kier haci algo relaciona na deporte y prome mi a pensa docente di gym. Pero mi no kier a bira docente, mi kier a haci e parti di deporte; pero mi no kier a bira docente. Despues mi a pensa fisioterapia, pero esey tampoco no tabata e opcion pa mi. E ora mi a wak e opcion pa bira un sport dietician, dus pa yuda e atletanan den area di alimentacion y e ora ey mi a pensa esey lo ta perfecto pa mi pasobra mi ta den e mundo di deporte.”
Na 2010 Charlene a sali rumbo pa Nijmegen unda el a studia Voeding en Dietetiek cual el a termina na 2015. El a regresa Aruba e mesun aña y mientras tanto el a cuminsa un online Masters course den Epidemiology and Public Health, di cual actualmente e ta trahando riba su tesis pa asina termina e estudio.
Desde cu e tabata chikito Charlene tabata practica atletiek y te na momento cu el a bay Hulanda e tabata activo den e mundo di atletismo. Incluso na Hulanda e tabata practica e deporte tambe cu e team na Nijmegen.
Na 2007 Charlene a habri su halanan un poco mas y a participa den e competencia local Aruba Model Search y di eynan algun aña despues el a participa den e certamen di beyesa Miss Universo representando Aruba.” Door di mi amigonan cu a motiva mi pa participa den Aruba Model Search mi a bisa why not, y semper cu bo ta den e mundo di modelahe e mundo di miss ta conecta cu esey”, el a conta. “E mundo di miss echt no tabata mi mundo, pero e persona cu a yuda mi semper, Endy Croes, tur aña tabata puntra mi si mi kier a competi pa miss y semper mi tabata bisa absolutamente cu no.”
“Ora mi a bin back di Hulanda, sigu’mi mi a wak e ultimo Miss Universe cu tabata Pia Wurtzbach di Philippines, y un otro miss tambe cu a sali 1st runner-up na Miss USA cu tabata mustra personanan real, cu nan tabata bunita di pafo, pero nan tabata mas bunita di paden. Esey ta loke a pone mi cambia mi mente y mi a dicidi di purba y e tabata un oportunidad unico. Finalmente mi a yega te Philippines na Miss Universo y esey tabata un experiencia hopi bunita, no cu mi lo hacie atrobe pasobra mi a realisa si cu esey no ta mi mundo, pero mientras mi tabata eynan e tabata un bunita experiencia si”, el a bisa.
Charlene ta conta cu durante su di tres y di cuater aña di su estudio, e mester a haci diferente ehercicio unda cu por ehempel e tin un cliente su dilanti y e mester practica un consulta. Na e momento ey el a ripara cu e tabata gusta, pero el a haya mas interesante e otro areanan manera e proyectonan y tareanan cu e mester a haci, vooral con bo por pone un comunidad cambio su habitonan. Di eynan el a ripara cu e parti di health promotion e tabata haya super interesante.
“Ora mi a yega di Hulanda mi no kier a bay traha den consulta, mi kier a traha den health promotion, pero mi no a haya oportunidad di trabou den e area ey, e ora mi a dicidi pa en berdad habri mi dietiste praktijk na 2016. Fin di e aña ey mes mi a logra haya trabou na IBISA den e area di health promotion y na 2018 ora mi contract a caba na IBISA mi a bay back na haci consulta. Aworaki mi a haya e oportunidad pa traha cu Fundacion Diabetes Aruba ariba e proyecto PRISMA, y for di eynan mas proyecto a bin dilanti. Aworaki mi tin mi praktijk pero mi ta combina algun consulta cu diferente proyectonan tambe. No tin un dia regular pa mi, tur dia ta diferente y juist esey mi gusta di mi trabou cu e no ta un dia di mainta te atardi ta haci consulta so, tin hopi variacion”, Charlene ta conta.
Un problema den e poblacion di Aruba ta e cifranan di sobrepeso y obesidad, cu segun Charlene ta splica hunto e cifra ta casi na 80% di e poblacion y esey ta un cantidad hopi halto. E ta splica cu aunke tin hopi mas hende ta consciente, hopi mas hende ta activo, hopi mas ta pensa ariba kico nan ta come of ki ora. Locual ta preocupante p’e ta cu tin dos extremo. “Tin e persona cu ta hopi activo casi tur dia, cu ta come hopi saludabel y esey ta hopi great. Pero den e otro extremo bo ta haya cu juist nan no ta come saludabel, nan ta come hopi riba caya, por ta hopi uso di bebidanan alcoholico y no ta move hopi”, el a bisa.
“Pero eigenlijk memey, unda cu e alimentacion saludabel ta normal, cu tin movecion reguralmente sin pone tanto presion, unda cu un alimentacion y un estilo di bida saludabel ta normal, esey casi bo no ta wak. Y esey ta unda nos mester bay traha riba dje pa nos por yuda e personanan aki cu por ta nan ta un tiki mas consciente y ta haci stapnan chikito tur dia pa tin un estilo di bida mas saludabel.”
