E linguista Ramon Todd Dandaré su charla tocante Carboverdiano y Papiamento a bira uno fructifero y placentero. Pa elabora e charla aki, e linguista a consulta e trabou cu Dr. Efraim Frank Martinus (d.f.m.) a realisa, ya cu e tabata e prome Antiano cu a bin cu un estudio comparativo entre e relacion estrecho cu ta existi entre e structura di Carboverdiano y Papiamento.
Martinus den su tesis doctoral The Kiss of a Slave a indica cu e obhetivo principal di su trabou di tesis ta esun di aporta prueba pa e teoria di asina yama crioyo Afro-Portugues. Otro obhetivo di su trabou ta di demostra cu Papiamento ta cuminsa su evolucion na Antia Hulandes, esta Corsou alrededor di 1640 como un mescla di diferente dialecto Afro-Portugues cu a bin for di costa occidental di Africa pa Antia Hulandes, como consecuencia di comercio di catibo.
Carboverdiano y Papiamento
Sr. Todd Dandaré a bisa tambe cu den e parti final di su tesis di Martinus ta referi na e hipotesis di crioyo-Brasileño ta un hipotesis di crioyo-Africano occidental di Carboverdiano. Tambe e parti aki di e tesis ta contene un comparacion historico/fonologico estrecho entre Papiamento e dialecto Carboverdiano y otro dialectonan Africano, te hasta esun di Palenquero di e localidad di San Basilio de Palenque na Colombia. For di e gran similaridad cu ta existi entre lenga crioyo Africano occidental, Papiamento y otro lenganan crioyo menciona, Martinus a purba di sostene den su tesis cu Papiamento den prome instancia ta un lenga crioyo treci for di Africa.
E hipotesis aki tambe e linguista ta sostene den gran parti pa medio di e charla cu el a duna bou e titulo subhetivo: “Papiamento y Carboverdiano, dos taki di e mesun palo”, y relacion entre nan structura gramatical. P’esey el a dedica e charla aki na su gran amigo y colega Efraim Frank Martinus. Aunke el a aclaria cu ta existi un diferencia entre e tesis diacronico di Dr. Martinus y esun di dje. Ya cu sr. Todd Dandaré su comparacion entre ambos lenga, el a haci a base di diferente structura gramatical actual.
E linguista local a bisa cu como tributo na sr. Martinus y siguiendo su ehempel, el a skirbi un articulo cu a wordo publica aña pasa como un prome inicio pa un estudio comparativo di e gramatica di e diferente variante Carboverdiano y Papiamento. Y e linguista Todd Dandare a hacie di un forma masha creativo y agradabel, pa medio di interpretacion di un cantica contagioso “Mi Ku Bo” canta pa Tamara Nivillac den e dos lenganan, Papiamento y Carboverdiano. E trabou di e linguista sr.Todd Dandaré no solamente ta uno interesante, sino compleho, ya cu el a haci un comparacion di e dos lenganan crioyo aki a base di nan respective gramatica, tanto di Papiamento como di Carboverdiano.
Di otro banda sra. Des Croes kende ta directora di e departamento Arubiana/Caribiana, a informa cu dia 8 di februari pa 8or anochi lo tene un presentacion di e buki mas nobo di Denis Henriquez bou e titulo: “Het sterven van Rebecca Lopez Ikario”. E obra aki ta e di cuater di e serie literario di “Zuidstraat”.
