Tur hoben di Aruba entre 14 pa 30 aña di edad ta invita; esnan bayendo scol, studiando of trahando, por acerca pa comparti nan punto di bista riba varios topico di interes pa Aruba su bienestar den un evento dirigi pa hubentud, organisa pa Universidad di Aruba.

Ta importante pa hobennan por tin bisa riba formulacion y ehecucion di maneho, pa por tin un vision balansa di Aruba cu ta inclui vision di e hobennan pa Metanan Mundial di Desaroyo Sostenibel (SDG’s).

 

E evento, cual tin enfoke riba discusion di temanan manera educacion, derecho humano (y di mucha), cu representacion di hoben, participacion democratico di hoben y bienestar social ta bay tuma luga mañan 10 di januari na Universidad di Aruba for di 6or di atardi te cu 9or di anochi y ta organisa pa facultad di Organization, Governance & Management (OGM).

Den esaki, hobennan ta bay trece dilanti nan punto di bista, tambe e manera cu nan punto di bista lo por ser incorpora tanto na nivel nacional como internacional, por ehempel, por medio di un hunta di hoben, panel di hoben of un representante hoben den arena internacional.

A base di e input ricibi durante e evento, ta bay forma e vision di e hobennan tocante nan posicion riba e topiconan menciona, y nan preferencia tocante representacion di hoben na Aruba y riba area internacional.

Ademas, nan ta bay compila e informacion adkiri y comparti esaki cu United Nations Youth Representative(s) of Human Righs & Safety di Reino Hulandes, manera Fenna Timsi, ken ta un representante hubenil na United Nations. E ta un hoben mita Hulandes y mita di Argelia, cu ta comprometi cu politica y kier pa e stem di hobennan por ser scucha na henter mundo. Ademas di dje, Kevin Eustatia-Palm, un hoben Curasoleño tambe ta representante hubenil di Nacionnan Uni y esun prome cu descendencia Caribense cu ta participa den esaki.

Den su proximo dos aña, Kevin ta bay ta papiando cu hobennan di tur edad, pa asina representa nan na Nacionnan Uni na New York y Geneva, un tarea cu segun e mes a menciona “no lo ta facil, pero mi tin henter un ekipo cu lo bay yuda mi cu esaki. Corsou por fin lo bay tin un stem riba nivel internacional,” el a bisa riba su rednan social.

Como orador ta bay ta Tracy van der Biezen ken ta miembro di United Nations Youth Working Group Hulandes y ta alumno di Overseas Countries & Territories Youth Network (OCT). Van der Biezen ta enfoca riba representacion di hobennan di e islanan Hulandes den e Working Group cual ta forma parti di e Nationale Jeugdraad di Hulanda. E ta interesa pa encurasha mas hoben pa participa den procesonan democratico.

Ademas, Tracy ta e prome persona cu a gradua di SISSTEM di Universidad di Aruba na 2022. Na maart 2019 a firma e acuerdo y na september 2019 a bira un facultad na Universidad di Aruba dirigi riba e materianan tecnico STEM (Science, Technology, Engineering y Mathematics) y sostenibilidad.

Presente den evento aki ta bay ta e representante hoben di e Youth Network, Mauriëlle Tromp, pa asina scucha y dialoga cu tur presente ademas di Fenna Timsi y Kevin Eustatia-Palm.

Potretnan ta di rednan social di Fenna Timsi y Kevin Eustatia-Palm.