E aña aki e Nationaal Comité 4 en 5 mei di Amsterdam a invita autor Quito Nicolaas pa duna un charla. Na e charla, cu lo tuma luga 5 di mei pa 12’or di merdia na Warda di Polis na Amsterdam Zuidoost, lo trata e tema di e campamento di internamento na Boneiro y lo incorpora e papel cu Aruba a hunga durante guera.
Esaki pa ilustra e triangulo den cual e tres islanan a modula y e funcion cu cada uno tabata tin. E tema di e aña aki pa celebra e liberacion di Hulanda ta “Vrijheid en Interneringskampen op Bonaire en Suriname.”
Durante su charla, e lo enfoca riba esnan – principalmente di nacionalidad Aleman – biba na Aruba, kende a ser captura y interna na un di e campamentonan situa na Boneiro. Un di nan ta famia Zielinski – tata di e autor Erich Zielinski – kende a ser deporta di Aruba. Tambe esnan di Corsou, por ehempel Medardo de Marchena kende tabata di decendencia hudiu, cu a keda interna pa motibo di su ideanan. Den varios caso e personan aki a wordu inhustamente deporta y interna. Nicolaas lo papia tambe entre otro tocante e preparacionan pa cu e guera y e forma con na Aruba un ke otro a ser organisa.
Durante su investigacion y estudio, Nicolaas a bin topa den e documentonan algun incongruencianan cu no ta cuadra cu realidad. Echosnan den nos historia cu mester keda coregi. Cu esaki e kier indica cu mas investigacion mester ser realisa pa aclarea un ke otro den tempo di guera. Di Archivo Nacional di Aruba e autor a ricibi un bon coperacion pa por a conduci y conclui e investigacion na tempo.
