Diamars pasa, na MFA Noord, a tuma luga otro charla tocante e prevencion di abuso sexual di mucha. Esaki ta presenta pa Fundacion Lisette Gomes, Gobierno di Aruba, conhuntamente cu Arubaanse Padvindsters Gilde (APG) na varios luga. Su obhetivo ta pa informa comunidad riba con pa siña muchanan pa cuida nan mes y papia cu mayornan tocante e tema aki.
Durante e charla, Carmen Herrera, creador di e metodo di prevencion di abuso sexual ‘Bisa no, Core bay, Bay keh’e’, basa riba su obra teatral ‘E Herencia’, a mustra con por siña e muchanan cu ningun hende mag di mishi un mucha na su partinan intimo. El a splica cu e metodo aki ta basa e topico: Mi Curpa, Abuso fisico y sexual, Ken ta straño y No cay den trampa, esakinan ta traha riba un buki, cantica y leesplaatjes disponibel na tur scol publico.
Durante e charla tambe tabatin un panel di discusion, unda e personanan cu a asisti tabata puntra preguntanan tocante e tema aki, pa e expertonan di e instancianan concerni duna consehonan di conscientisacion y prevencion pa e mayornan.
Minister di educacion tambe tabata presenta pa duna sosten, y asina mes el a informa cu mester crea un comision contra abuso. El a expresa: “No por evita tin biaha cu e mucha ta den contacto cu un hende straño.” E ora ey, e mayornan tin cu siña con e ta proteha su mes contra un hende straño. Di otro banda, mayoria di biaha e abusado ta un persona conoci den famia, y p’esey e muchanan mester ta prepara.
