Despues di algun siman di preparacion intenso, e tan anticipa programa pa hoben, “Changemakers” a ranca sali. Cu un registracion oficial di 30 hoben, e ekipo tabatin nan prome sesion cu a consisti di un ‘Welcome Session’ den un ambiente special y strategico cu a tuma luga na Surfside Marina. Strategico, pasobra ‘Welcome Session’ tabatin como meta pa laga e hobennan conoce otro, un poco mas aleu cu un ‘simple handshake.’

“Changemakers” ta un programa di emprendemento social transformativo cu tin como meta pa empodera hobennan, pa nan crea un impacto duradero den nan bario. Bou guia di coachnan Amarelys Ridderstap, Xena Profeet y Sharleen Tromp, kendenan lo ta dirigiendo e grupo di hobennan den coaching, supervision, duna sesionnan di tayer como tambe sesionnan di “one on one,” entre otro.

E ‘Welcome Session’ a start den un atmosfera celebrativo unda hobennan a ser ricibi cu nan ‘goody-bags’ yena cu snack, regalo y nan T-shirt oficial di “Changemakers.”

“E prome sesion di ‘Bon Bini’ a keda facilita pa organisacion “Reach your Goal,” cu tabatin como meta laga e hobennan conoce otro por medio di varios actividad gozoso. Ta trata di un mescla di hobennan cu ta atende diferente scol, nos tin hobennan di Colegio EPI, Mon Plaisir College HAVO y di Colegio Arubano. ‘Reach your Goal’ a presenta un “Fun Activity” cu a tuma luga dilanti di Surfside Marina riba e area di beach. Aki hobennan mester a traha den ekipo, y asina tambe por a identifica e personalidad di cada hoben,” fundador y coach Sharleen Tromp a splica.

“E hobennan mester a practica comunicacion, scucha otro, sostene otro, inspira, motiva y confia otro, como tambe percura pa no laga otro atras. Na mesun momento experiencia un tiki competencia tambe. Tur esaki ta componentenan strategico cu a forma parti di e sesion pa asina nan logra relata cu otro di tal manera pa nan por ta exitoso,” Tromp a indica.

“E hobennan ta hopi contento pa inicio di e jornada aki y tin hopi anticipacion pa e simannan binidero unda coachnan lo bay ta dirigiendo e grupo di hobennan den coaching, supervision y duna sesionnan di tayernan como tambe sesionnan di “one on one,” entre otro,” el a agrega.

E programa di coaching y ekipamento lo tin un termino di cuater luna cu lo culmina den un presentacion y plan di ehecucion di nan proyecto di cual nan lo haya oportunidad di ser financia. Sesionnan lo tuma luga tur diahuebs di 3pm pa 5pm den edificio di ATIA na Dakota.

Proyecto “Changemakers” ta un iniciativa di Fundacion Lead by Design den colaboracion cu CEDE Aruba y Oranjefonds. Fundacion Lead by Design a gradici nan partnernan pa nan colaboracion pa cu e programa. Colaboracionnan cu ta permiti un crecemento transformativo den e hobennan, nan bario y cu por keda ofreci na nan, e futuro lidernan.