(AP) – Ora cu Chance the Rapper a bishita West Africa anteriorment e aña aki, inicialmente el a pensa cu su biahe cu artista Vic Mensa lo ta solamente otro vakantie.
Na luga di esaki, e ganador di Grammy’s a conecta cu Mensa su tata su famia na Ghana y otronan den e pais na un nivel hopi mas profundo. El a mira Ghana su costanan buntia, y a enamora di e cultura musical ademas di e escena di arte. El a siña hopi tocante e pais su historia rico di ta e prome pais sub-Saharan African pa libera su mes di e colonialismo.
Despues di mas trip na Ghana, Chance a dicidi di crea un serie di concierto gratis y show di arte visual pa asina otronan tambe por experiencia e pais su cultura vibrante di mesun manera cu el a logra. Durante zomer, Chance y Mensa a hiba 8 studiante di Chicago na Ghana pa nan siña mas tocante Africa.
“Mi a sinti hopi liber na Ghana, y mi kier pa otronan sinti e mesun manera,” Chance a declara, ken conhuntamente cu Mensa lo anfitriona e festival inaugural Black Star Line na Acra, Ghana den aña 2023. E festival di un siman largo lo tin eventonan, panelnan di discusion y un concierto gratis dia 6 di januari cu presentacion di Chance, Mensa, Erykah Badu, -Pain, Jeremih, Sarkodie, Tobe Nwigwe, Askaa Boys y M.anifest.
E evento lo ser organisa den Acra Black Star Square, un monumento na e libertad politico cu Ghana a gana den aña 1957. E festival su titulo a ser inspira pa e lider di derechonan civil Marcus Garvey su Black Star Line, cual a ser funda den aña 1919 y opera pa hendenan di color scur cu a yuda conecta trafico global y oportunidadnan turistico entre Merca, Caribe y Africa.
