Diadomingo anochi lo tuma luga evento di Chabad Aruba, caminda Eva Schloss, kende ta ruman di criansa di Anne Frank, lo conta su historia y trece dilanti un mensahe positivo pa sigui trece paz na mundo, enfatisando riba e importancia pa no permiti historia ripiti.
Chaya Blasberg conhuntamente cu su casa ta dirigi Chabad Aruba, un organisacion di stichting Judaism International cu meta pa transmiti mensahe di educacion y encuentro cu Hudaismo. Blasberg a bisa cu nan ta contento pa e evento, mirando cu Eva Schloss ta e ruman di criansa di Anne Frank, kende hende sa ta e mucha muhe cu a skirbi su diario durante Segundo Guera Mundial.
Den e caso aki Eva Schloss tambe tin su storia di conta, y ‘nan ta dos storia tristo’. Eva tambe tabata sconde na Hulanda durante e temporada di guera. El a keda su tempo den e campo di concentracion na Polonia y el a sobrevivi.
Schloss ta comparti su storia, su triunfo y con el a sobrevivi. E ta duna charla y comparti cu diversidad ta asina importante pa ta sigur cu atrocidadnan manera Holocaust nunca bolbe sucede na mundo.
“Ta importante pa duna un mensahe na e generacion nobo. Nos kier pa esunnan di scol secundario y mas avansa cu ta bayendo scol por tende e secuela (e dos parti) di Anne Frank su storia”, el a expresa.
Durante anochi lo tin Ruben Garcia como MC, tambe lo conta cu presencia di prome minister Evelyn Wever-Croes, kende lo duna e bon bini na esunnan presente y na Eva Schloss. Despues Schloss lo bin dilanti pa conta su storia y lo tin tempo pa pregunta. “E lo conta su storia pa publico y pa hende puntra cualkier duda.”
Blasberg tambe ta anuncia cu lo tin sorpresa special riba e dia di evento. Nan ta contento cu entrada ta bendiendo lihe. “Nos ta contento pa un evento asina, den cual un hende muhe di 90 aña di edad ta biaha for di London cu yen energia pa conta y motiva pa comparti e mensahe.”
Lisanne di Do It Center ta bisa cu ta curasha hende pa bay y no perde un evento cu ta educativo. “Nos tur ta siña di Anne Frank, pero Eva Schloss tin un buki cual ami mes a cuminsa lesa y ta uno emocional. E ta un chens pa topa cu un sobreviviente di historia cu el a biba aden y por siña di dje.”
Si kier obtene mas informacion prome cu e evento por bishita e website annefrankaruba.com cu tin informacion di Eva Schloss. Ta conseha pa hende busca ticket mirando cu no ta tuma mas di 2,000 persona den evento.
“E ta bezig ta comparti e mensahe rond di mundo tocante paz mundial. E ta conta locual el a pasa aden, pero con el a pasa e problema di un manera positivo. El a surpasa cierto cosnan cu el a pasa durante guera cu e por papia di dje positivamente.”
