Colegio di supervision financiero di Boneiro, Sint Eustatius y Saba (Cft) ta constata cu e proceso di presupuesto y responsabilisacion y maneho financiero na Saba ta sigui ta di suficiente nivel, y ta determina tambe cu te ainda ta financia algun tarea structural incidentalmente.

For di 2014 Saba a ricibi declaracion aprobatorio di accountant pa tur e cuentanan anual y e demas documentonan presupuestario y reportahenan di ehecucion ta cumpli cu e normanan rekeri. Sinembargo, Cft ta identifica un serie di reto cu Saba, den cooperacion cu Hulanda, lo mester atende den e proximo periodo. Ta trata principalmente di creacion di cobertura structural den e presupuesto anual pa e tareanan structural y creacion di suficiente capacidad di resistencia.

Financiacion structural pa tarea structural.
Na 2019 Estado Hulandes y Entidad Publico Saba a acorda e asina yama ‘Saba Package’, den cual ta inclui, entre otro, cu tur dos lo haci nan esfuerso pa financia tarea structural cu recurso structural. Lo considera pa ministerio ta con lo realisa esey. Na october 2019 Gabinete Hulandes a indica tambe den su reaccion riba e informacion di Conseho di Estado y e Investigacion di Maneho Interdepartamental cu lo aclara y revisa e particion di tarea, pa despues investiga si e ‘vrije uitkering’ (placa pa gasta libremente cu Hulanda ta pone na disposicion, inclusivo impuesto di Hulanda Caribense) ta cuadra den e pakete di tarea pa e entidadnan publico. Cft a palabra cu Colegio Ehecutivo pa conhuntamente haci un inventario mas detaya di esey.

E presupuestonan di 2019 y 2020.
E di cuater reportahe di ehecucion di 2019, tocante cual Cft a duna conseho recientemente, ta mustra un saldo positivo di USD 0,1 miyon. E proyecto di presupuesto di 2020, ricibi door di Cft dia 16 di october 2019 pa su conseho, ta balansa. Esaki a bay compaña pa e hopi esfuersonan. Pasobra, Saba a hay’e obliga di reduci e sumanan presupuesta na cierto post en comparacion cu e añanan anterior. Por ehempel, a reduci e post Imprevisto di 100 mil dollar na 2019 pa 22 mil dollar na 2020. Cft a conseha Saba pa añadi un eventual surplus na 2019 na e presupuesto di 2020. Cft a husga cu e presupuesto di 2020 ta cumpli suficientemente cu e criterionan. Conseho Insular a aproba e presupuesto di 2020 dia 13 di november y Ministerio di Asunto Interno y Relacion den Reino (BZK) a ratifica esaki dia 3 di december, conforme e conseho di Cft.

Durante e bishita di Cft na Saba diamars dia 18 y diaranson dia 19 di februari 2020 a tene combersacion constructivo tanto cu Colegio Ehecutivo como cu Conseho Insular.