For di e comentario di e colegio di supervision financiero (Cft) pa Curaçao por destila cu e organismo aki parcialmente ta aproba e presupuesto pa 2020 di e isla. A pesar cu pa 2020 y e añanan despues gobierno di Corsou ta presenta un presupuesto sin deficit, no ta cumpli enteramente cu e ‘instruccion’ cu e isla a haya recientemente.
Pa compensa e deficitnan di 2017 y 2018 tin mester di compensacion den e presupuestonan di 2021, 2022 y 2023, loke no ta e caso. Tin proyecta pa compensa ANG 117,7 miyon mientras cu mester compensa ANG 175,3 miyon. Ta necesario pa revisa e presupuesto pa incorpora e deficit aki completamente.
Preocupacion tin tambe pa e desaroyo economico. Ta anticipa un crecemento real negativo di -2,6% pa 2019 y pa 2020 di -3,8%. Inflacion pa e añanan aki lo ta respectivamente 2,9% y 5,0%. Ta spera desaroyo positivo den sector turistico, mientras ta anticipa cu e ciere di e refineria no lo tin gran efecto mas na 2020 y cu e medidanan cu gobierno lo mester tuma den cuadro di e ‘aanwijzing’ lo tin efecto negativo riba consumo en general. Aumento di accijs y introduccion di e ABB lo percura pa inflacion creciente na 2019 y 2020.
Ta pesey cu Cft ta duna e recomendacion pa pone enfasis mas grandi riba e medidanan pa reduci gasto, y menos riba esunnan pa aumenta entrada. Como posible riesgo gobierno mes ta señala e posible ciere di e refineria, e aumento di e problema di refugiado Venezolano y e efecto incierto di e aumento di impuesto. E estudio di Banco Central di Corsou y Sint Maarten, riba cual e pronosticonan di gobierno ta basa, no tabata disponible pa Cft. Por lo tanto nan no por duna un evaluacion di e eventual scenarionan cu gobierno ta contempla. Cft ta pidi pa pone e analisis disponible ainda.
