“Corsou mester implementa e reformanan cu lo fortalece e pais di forma duradero na un manera rapido y energico”, asina Colegio di supervision financiero di Corsou y Sint Maarten (Cft) ta plantia. E instruccion cu Conseho di Ministro di Reino a duna Corsou na juli, combina cu aplicacion di e Strategia di Crecemento, ta ofrece oportunidad pa cambia e situacion di forma duradero.
Segun un comunicado di prensa, dia 12 di juli 2019 Conseho di Ministro di Reino a duna Gobierno di Corsou un instruccion pa balansa gasto y entrada den e presupuesto durante mas aña. E instruccion ta stipula, entre otro, cu lo mester compensa un deficit spera den 2019 den e aña ey mes y cu lo mester compensa e deficitnan combina di 2017 y 2018 di 175,3 miyon florin cu surplus na 2020, 2021 y 2022. For di e surplusnan aki lo mester resolve, ademas, e atrasonan di pago di e debenan cu Fondo di Pensioen General di Corsou (APC) y Banco di Seguro Social (SVB), di cual e plaso di pago a caduca.
Strategia di Crecemento.
Desempleo na Corsou ta halto en comparacion cu otro isla den Caribe. Bou di hubentud e ta te hasta 33 porciento. Den e Strategia di Crecemento Gobierno a indica con lo por reforma economia. Aki ta trata principalmente di reforma structural, manera reforma di mercado laboral, fortalecemento di e capacidad administrativo y creacion di un clima empresarial mas stimulante, door di cual por incorpora efectivamente capital humano y financiero no utilisa.
Corsou y Hulanda a firma un Acuerdo di Crecemento tocante e stapnan concreto cu Gobierno lo mester tuma den e proximo periodo y e apoyo cu Hulanda lo ofrece tocante esaki. E Acuerdo di Crecemento ta ofrece espacio pa incorpora recurso adicional y asistencia di personal. E Acuerdo di Crecemento ta permiti tambe un prolongacion di e periodo di compensacion, si na juli 2021 sali na cla cu a cumpli cu e palabracionnan suficientemente. Ta di gran importancia pa haci uzo optimal di e Acuerdo di Crecemento.
Ehecucion di presupuesto di 2019.
A ahusta e pronosticonan pa aña presupuestario 2019 y e presupuesto, incluyendo e prome modificacion di presupuesto, ta mustra un servicio ordinario balansa. Tin un aumento di e entradanan fiscal, debi parcialmente na un golpi di suerte incidental di 42,1 miyon florin procedente di e Areglo Fiscal di Reino (BRK). Tambe pa 2019 ainda tin un tarea pisa pa controla e gastonan y realisa e entradanan efectivamente, incluso despues di e candela na Landsontvanger.
Curaçao Medical Center.
Apertura di e hospital nobo Curaçao Medical Center (CMC) ta programa pa dia 15 di november 2019. Na augustus Gobierno a entrega un peticion pa un prestamo adicional di 200 miyon florin. Anticipando e estudio di factibilidad actualisa cu e di dos opinion corespondiente, cu te ainda e no a ricibi, Cft a manda un reaccion provisional dia 27 di september 2019, den cual a inclui e posibilidad di haya un prestamo di 103,7 miyon florin a traves di e registro actual, con tal cu cumpli cu algun condicion. Ademas di e estudio di factibilidad ta trata tambe di, entre otro, e cobertura di e gastonan adicional di operacion di CMC en comparacion cu SEHOS. Despues di ricibi e documentonan pidi – awor priminti pa aki cinco siman – lo sigui un reaccion definitivo di parti di Cft riba e peticion di prestamo.
Maneho financiero.
Mayoria di e sub-proyectonan di e Mapa di trayecto pa un declaracion aprobatorio di accountant di e cuenta anual di 2021 entretanto a cuminsa caba. Pais Corsou ta premira cu falta capacidad suficiente pa implementacion di e plannan. Por lo tanto, Cft ta conseha Gobierno pa haci uzo di e espacio cu e Acuerdo di Crecemento ta ofrece, door di pidi apoyo tambe pa e meta ey. Ta esencial pa, unabes cu haya e apoyo ey, presta atencion explicito pa salvaguardia e conocemento y competencianan adkiri.
Cft a haci un bishita na Corsou di dia 21 pa dia 23 di october y a tene combersacion cu Gobernador, Ministro di Finansa (dos bes, un di nan den cual e Ministro a haya sosten di e Director y Supervisor Ministerial – MRT), Conseho di Ministro, Comision di Finansa di Parlamento, Comision di Progreso di e Acuerdo di Crecemento, Fundacion Oficina di Contabilidad di Gobierno (SOAB), Directiva di SEHOS, Banco di Seguro Social (SVB) y Banco Central di Corsou y Sint Maarten (CBCS).
Dialuna dia 21 di october Presidente di Cft, Señor Raymond Gradus, a tene un charla publico titula “Supervision financiero y crecemento economico”. Por consulta e presentacion via e website di Cft: www.cft.cw.
