WILLEMSTAD – Colegio di supervision financiero (Cft) a conseha Conseho di Ministro di Reino pa duna Corsou un instruccion pa balansa e gastonan y e entradanan pa mas aña den presupuesto.
E entradanan y e gastonan di pais Corsou no ta den balans y e maneho financiero no ta na ordo. A cera aña presupuestario 2017 cu un deficit di ANG 116,8 miyon y e deficit provisional den 2018 ta monta na ANG 52,7 miyon. Ya for di aña 2016 Cft ta expresando su preocupacion tocante e situacion financiero di Corsou. Al respecto Cft ta señala calculacion di entrada demasiado optimista, deficiencia den e maneho financiero y un falta di disciplina presupuestario, cu ta haci cu e gastonan no ta keda denter di e limitenan di e presupuesto.
Tambe pa e presupuesto di 2019 tin un menasa di un deficit (substancial) di aproximadamente ANG 100 miyon e biaha aki. A pesar di algun medida significativo cu pais Corsou kier introduci entrante dia 1e. di juli proximo, pa di tres aña consecutivo lo no cumpli cu e norma legal di un servicio ordinario balansa. Mester di mas cu solamente e medidanan ya anuncia pa balansa e entradanan y e gastonan di e pais. Mester cambia rumbo!
Cft ta consciente cu e tarea di Corsou ta considerabel, pero reforma structural ta inevitabel. Reforma structural ta necesario pa garantisa continuidad di e previsionnan colectivo y pa crea e espacio necesario pa compensa e deficitnan ey for di otro aña y pa yega na inversion adicional, entre otro den enseñansa y educacion. Si laga e deficitnan sigui crece, esey lo nifica cu e debe publico lo sigui aumenta y lo transferi pa e generacionnan futuro.
Fortalecemento di economia di Corsou ta rekeri principalmente inversion priva. Un condicion basico necesario pa esey ta un maneho sostenibel y sano di financia publico. Di pursi cu inversionista priva kier limita nan riesgonan y kier por confia riba stabilidad y calidad di e aparato gubernamental y administrativo di e pais. Tambe den esey lo mester avansa den e proximo añanan.
Teniendo cuenta cu loke a menciona anteriormente, Cft a dicidi di conseha Conseho di Ministro di Reino pa duna Gobierno di Corsou un instruccion. Ta keda na Conseho di Ministro di Reino pa dicidi si lo duna e instruccion y, den caso afirmativo, cua lo ta su contenido exacto. Prome cu duna e instruccion, ta duna gobierno di Corsou e oportunidad pa duna su opinion al respecto.
Cu drentamento na vigor di e relacionnan estatal nobo dia 10 di october 2010, y cu un saneamento di e debenan di parti di Hulanda, Corsou, Sint Maarten y Hulanda a acorda di regula supervision financiero pa medio di un Ley di Reino. Conseho di Ministro di Reino (Hulandes) ta eherce e supervision financiero, mientras cu Colegio di supervision financiero tin un funcion consultativo y di señalacion. E obhetivo di e ley di Reino di supervision financiero (Rft) ta di pone y mantene na ordo e economia financiero a fin di evita problema financiero nobo y realisa financia publico sostenibel.
