Certificado di reconocimento na Grupo Civico Birgen di Cisne

Ayera e Consulado Honorario di Ecuador na Aruba entrega un reconocimento den forma di certificado na e Grupo Civico Birgen di Cisne den cuadro di conmemoracion di Dia di Independencia di Ecuador diasabra awor.

Di e forma aki, Magali Guzman kende ta Consul Honorario di Ecuador, a haci reconocimento pa e labor di solidaridad cu e grupo civico aki ta bin realisa cu e comunidad Ecuatoriano durante e ultimo 8 añanan.

“E certificado aki ta un estimulo pa nan por sigui traha di un forma organisa den bienestar di e famianan Ecuatoriano. Pero tambe den cualkier evento y cualkier necesidad cu nan por tin,” el a bisa.

E diplomatico a bisa cu e grupo di compatriota Ecuatoriano a wordo forma pa venera e Birgen di Cisne cu nan ta yama cariñosamente como “Churonita.” Nan ta realisa actividadnan pa apoya esunnan den necesidad y tambe nan ta representa Ecuador den campeonato di futbol local.

Den nomber di e Grupo Civico Birgen di Cisne, Manuel Vizho y Felipe Romero a ricibi e certificado di reconocimento gradiciendo na nan consul pa e gesto aki. Igualmente nan a laga sa cu nan deseo ta cu e grupo aki por bira mas grandi y tambe pa nan por sigui cu nan labor di solidaridad y ayudo pa esunnan den mas necesidad.

Tambe palabranan di reconocimento a bay pa Norma Guzman kende ta un miembro activo di e comunidad Ecuatoriano. Den pasado el a traha activamente pa recauda fondo pa yuda e victimanan di e temblor na Ecuador. Igualmente e ta trahando pa organisa pa prome biaha oficialmente e dia nacional di independencia di Ecuador.

Consul Guzman a bisa cu e comunidad Ecuatoriano ta estableci alrededor di 30 aña pasa na Aruba. Algun di nan ta doño di nan propio negoshi y otronan ta traha den e sector turistico y construccion. Ya caba tin un generacion di hobennan cu a nace na Aruba di mayornan Ecuatoriano cu actualmente nan ta studiando na Hulanda.

Consulado Honorario di Ecuador na Aruba ta invita comunidad di Ecuador y pueblo di Aruba den general pa participa den un Santo Sacrificio di la Misa diasabra awor pa 7’or anochi na Misa Birgen di Fatima na Dakota.