Comunidad Arubiano a mantene pa un tempo e tradicion pa celebra e fecha natal di su mahestad reina Juliana y Reina Beatrix riba 30 di april. For di aña 2014 Aruba ta celebra e dia 27 di april, cual ta e fecha natal di Rey Willem Alexander, den un acto di aprecio pa Cas Real.
Dia di Rey ta un dia nacional caminda comunidad di Aruba ta celebr’e cu diferente eventonan tanto cultural como social y deportivo, riba e dia aki tambe ta tuma diferente actividadnan den barionan como hisamento di fli e cual ta un tradicion cu comunidad no ta laga bay perdi.
Ayera mainta, na Plasa Wilhelmina Park a tuma luga e ceremonia protocolar di Dia di Rey cu presencia di diferente mandatarionan incluyendo su excelencia gobernador di Aruba Sr. Alfonso Boekhoudt e cual a duna su discurso unda el a señala cu e ta contento di por celebra e di 55 aña di Rey Willem Alexander, como gobernador e ta representante di rey na Aruba y como hefe di gobierno el a menciona cu e ta hopi contento di mira cuanto muchanan perteneciente na diferente gruponan di scout a asisti na e acto protocolar aki pa asina nan mustra nan aprecio na Rey Willem Alexander.
“Pasobra mi sa cu e ta deseo di nos tur pa celebra e dia aki cu pa nos ta algo hopi special dentro di Reino, na nomber di Gobierno di Aruba y na nomber di Gabinete di Gobernador pa medio di esaki nos ta felicita tambe su mahestad Rey Willem Alexander pa su cumpleaños.”
Despues di un celebracion un tiki sobrio manera su excelencia gobernador a sigura pa motibo di pandemia di Covid-19 , “gracias a dios nos por celebra e dia aki cu mas libertad pasobra nos a siña di aprecia e balor di libertad aki cu ta algo hopi grandi dentro di Reino y aun mucho mas den tempo di pandemia na Aruba pero na Hulanda tambe”.
Despues di menciona e condecoracion cu a wordo entrega na diferente personanan di e sociedad pa nan bon labor y contribucion, su excelencia gobernador tambe a señala cu di mesun manera a duna un atencion na e hobennan pa medio di e Copa Hubenil Gobernador Felife B. Tromp “pasobra asina tambe nos a duna realce na loke nos hobennan ta contribui cu nos sociedad, pasobra si nos hobennan progresa den deporte y logra cosnan grandi, ta Aruba a logra cosnan grandi, si nos hobennan progresa ta Aruba a progresa” tabata parti di e discurso.
E copa Hubenil aki a wordo introduci pa stimula e desaroyo di e hobennan cu otro organisacion di premio, e copa hubenil y e condecoracionnan ta expresa cu nan ta mira e gran trabao di hobennan, di grandinan y tur loke nan a haci cu esfuerso pa nan sigui sostene nos sociedad cu a wordo mira y a wordo aprecia.
Pa finalisa, su excelencia gobernador a bisa cu “mi ta confia cu e dushi pueblo y dushi hendenan lo sigui desaroya nan mes, nos lo sigui bay pa dilanti despues di e pandemia cu nos a conoce, nos lo sa di enfrenta e retonan cu nos tin nos dilanti, pero no laga nos lubida, cu nos por enfrenta e retonan aki cu pasion, nos por enfrenta nan cu responsabilidad, pero importante ta pa nos enfrenta nan cu compasion, cu convivencia, hunto cu otronan, pasobra asina nos ta demostra cu nos balornan social ta grandi pa nos, nos a demostra con e hende ta grandi den nos isla, kico nos ta interesa pa wak tur hende, no solamente nos muchanan, tambe e grandinan pa sigui crece y desaroya nan mes cu de generacion pa generacion nos por bisa cu nos ta un pueblo bendiciona”.
