Ayera mainta, representantenan di Consulado Dominicano na Aruba y Directiva di Fundacion Dominicana Arubaanse Juan Pablo Duarte, tabatin un acto senciyo di ponemento di ofrenda floral riba plasa Juan Pablo Duarte, den cuadro di e hecho historico di Dia di Restauracion na Republica Dominicana.
Consulado
Den nomber di e consulado Dominicano, Edward McCollum kende ta vocero di e sede diplomatico aki a recorda cu un dia manera ayera, pero 156 aña pasa, e pueblo Dominicano a dal un grito di revolucion y libertad contra e imperio Spaño. Den cuadro di e conmemoracion di e acontecimento historico aki –segun McCollum- nan a dicidi conhuntamente cu e fundacion y un grupo di Dominicano pa haci honor na e himno di nan pais y tambe di ‘nos dushi Aruba’.
El a probecha pa haci un yamada pa tur Dominicano na Aruba pa nan tin nan documentonan na ordo. Ya cu algun di nan conciudadano ta confrontando problema; y e ta haya cu e autoridadnan di Aruba tin tur derecho pa exigi e cumplimento di nos ley. “Si usted no tiene su documento al día, usted esta cayendo fuera de la ley,” asina el a bisa na Spaño. Ta importante pa nan tin nan documentonan na ordo y evita cualkier tipo di buraco entre nan permisonan, el a remarca.
McCollum a haci enfasis muy specialmente na e cedula di identidad electoral. E ta un documento masha importante pa e Dominicanonan por realisa cualkier tipo di tramite, ya sea paspoort, acta di nacemento, etc. Igualmente el a pidi pa nan bishita e consulado y laga nan sa cual di nan documento nan tin mester di dje. Of cual ta e situacion di nan, podise cu algun di nan documentonan a caduca of tin un eror den dje, pa asina solicita e presencia di un comision di e Hunta Electoral na Aruba. “Nos ta bay duna un man na boso,” el a bisa.
Fundacion Dominicana Arubaanse Juan Pablo Duarte
E historiado Carlos Isidro Perez di e fundacion Dominicana Arubaanse Juan Pablo Duarte a papia riba e balor historico di Dia di Restauracion. El a bisa cu esaki ta un fecha transcendental den historia Dominicano. E ta haya cu Republica Dominicana ta un di e poco paisnan di mundo cu a conoce dos independencia. El a laga sa cu e patriotanan Dominicano a lucha pa rescata un biaha mas e independencia di nan pais. “Pasobra e Dominicanonan malo, manera Duarte a yega di bisa, a bende nos patria na e imperio Spaño,” el a declara.
P’esey e proceso di restauracion di independencia a nifica lucha y sacrificio. Den e lucha heroico aki miles di Dominicanonan y Spañonan a muri 156 aña pasa.
Na final, presidente di fundacion Dominicana Arubaanse Juan Pablo Duarte, Winston Tavarez a gradici e presencia di e medionan di comunicacion y tambe di tur esunnan cu a comparti cu nan e fecha patriotico aki. “Awe nos ta celebra cu orguyo e 156 aniversario Dia di Restauracion,” el a bisa. E fundacion cu e ta presidi, hunto cu e consulado di Republica Dominicana y Instituto Duartiano, ta masha honra di por a conmemora e fecha di restauracion di nan independencia na Aruba.
