Diahuebs anochi tabata un ocasion hopi importante unda a celebra e ceremonia di firmamento pa traspaso y restauracion di e edificio di EX-DOW. Minister di Turismo y Salud Publico Sr. Dangui Oduber a atende e ceremonia di traspaso oficial di edificio di ex-DOW pa Aruba Ports Authority (APA). Esaki sigur ta un logro historico pa Aruba Ports Authority pa por a logra cumpra y restaura un bunita monumento cu hopi caracteristica y historia den e curason di Oranjestad.
Den e ceremonia protocolar, su Excelencia Gobernador di Aruba, Sr. Juan Alfonso Boekhoudt y varios mandatario tabata presente pa presencia e momento historico aki. E proyecto di restauracion di edificio di EX-DOW ta marca un paso significativo pa mehora e infrastructura y servicio cu ta wordo ofreci na tanto localnan como turistanan. E edificio ta situa central den centro di ciudad, e ta e prome impresion cu turistanan crucero ta haya ora nan sali for di nos terminal crucero y miles di turista y local ta pasa dilanti e edificio aki tur dia.
Minister Dangui Oduber su vision y maneho den turismo ta basa riba keda haci inversionnan continuo den producto Aruba. Finalmente, Minister Dangui Oduber ta contento cu despues di un proceso largo ta marca un fecha importante na mei 2023 unda a firma MOU entre partidonan pa asina sondea e posibilidadnan pa APA cumpra e edificio for di Land Aruba y net 1 aña despues ta finalisa un fase importante cu ta e traspaso oficial di e edificio pa asina cuminsa prepara e siguiente fase cu lo bira e ehecucion di e bunita proyecto di restaura e edificio.
Minister Dangui Oduber ta gradici henter e team di ministerio di turismo cu a traha incansablemente riba e proyecto y sigur un danki special na management di APA, board di APA, ATA y DOW y Monumentenbureau pa hunto por bay realisa un hoya di proyecto pa Aruba cu nos tur por ta orguyoso di dje. Nos tin un futuro briyante nos dilanti y loke nos mester ta conserva nos libertad pa sigui desaroya nos pais manera nos mes ta desea esaki.
