Diasabra atardi un grupo di familiarnan, amigonan y deportistanan a sali haci un paddle out na Arashi den memoria di Omar Kuiperi cu a perde su bida na lama algun dia pasa.
Un gran cantidad di hende a reuni na Arashi den honor di Omar, mirando cu eynan tabata unda cu Omar a conoce lama y su amor pa lama a cuminsa segun su amigonan.
Esaki tabata un ceremonia pa – manera su amigonan ta yam’e – e ‘local legend’ Omar L Kuiperi cu a perde su bida tragicamente na lama algun dia pasa. Su amigonan ta comenta cu Omar tabata tin respet y admiracion pa naturalesa, pues a pidi tur participantenan pa mantene e beach y awa limpi, cual nan a haci.
E ceremonia di ‘Paddle out’ ta un ritual cu ta wordo haci rond mundo pa conmemora un surfer cu a perde su bida. Edward Nicolas Eman ta un di esnan cu a organisa e paddle out aki hunto cu familiarnan y conocinan di Omar. Edward a lanta cu Omar for di chikito. El a splica nos e proceso di e ceremonia unda tur body boarders/surfers a paddle out hunto den lama y topa e boto unda Omar a pasa su ultimo trip cu su amigonan cu e tabata cu ne. A hiba un artefacto diseña manera un turtuga cu ta disolve cu su as, lag’e bay den lama.
E ta sigui bisa nos cu ta bay tin hopi mas storianan cu lo bay pone den bukinan y celebra Omar su amor puro pa lama y naturalesa. Tabata tin varios deportista di lama local presente pa honra Omar, entre otro hoben deportista conoci Sarah-Quita Offringa. E ta bisa Bon Dia cu e ta kere cu tur deporte di lama ta rekeri hopi perseverancia. Pasobra pa via cu bo ta den naturalesa, bo tin cu realmente bay cu ne. E ta bisa cu bo no por bringa naturalesa.
“Mi ta kere cu esey ta duna bo un caracter, e ta forma bo si bo pasa hopi tempo na lama.”E ta bisa cu pa esunnan cu ta caba di cuminsa practica e deporte aki, e ta conseha pa semper bay surf cu amigonan mas pa siguridad y tambe pasobra e ta mas leuk.
Omar a biaha full rond mundo pa cu su deporte; Mexico, Chile, Francia, Spaña. Su amigonan ta enfatisa cu seguramente ta un ‘grandi mes a bay’. “Pa Omar mi ta kere no ta e deporte so pero ta e respet pa e lama tabata semper conta. Naturalesa tin cu wordo protegi, nos no ta haciendo nos best na e isla aki. E instancianan no ta optimal y sigur nos por protega mas di locual ta nos tera y lama na nos dushi baranca cu nos ta stima”, asina ta bisa nos.
