A pesar di e renuncia di Gobierno di Aruba dialuna ultimo, ayera a tuma lugar e ceremonia di apertura pa Aña Parlamentario Nobo segun tabata programa. Cu anuncio di prome minister Evelyn Wever-Croes cu ta bay tin eleccion dia 6 di december, ta implica tambe e disolucion di e parlamento actual. 
Asina mes, e actual parlamento ta continua y a opta pa bay door cu e formalidad di e ceremonia di apertura di Aña Parlamentario Nobo, a pesar cu tabata algo diferente y cu poco substancia. Entre otro, por a nota cu e discurso di Su Excelencia Gobernador Sr. Alfonso Boekhoudt, cu tradicionalmente ta enfoca riba e programa di Gobierno di Aruba pa e siguiente aña, tabata mas enfoca riba eleccion y e logronan di e ultimo aña. Su Excelencia a menciona cu e periodo parlamentario aki lo ta uno cortico, mirando cu eleccion ta programa pa dia 6 di december proximo. E eleccion aki probablemente lo resulta den un constelacion parlamentario diferente. Obviamente, tampoco a menciona ningun plan di maneho pa e proximo aña, ya cu esaki lo mester bay den man di e proximo gobierno, forma despues di eleccion na december.
Interesante tabata cu riba stoel di presidente di parlamento por a mira lider di fraccion Raiz, Raymond Kamperveen, kende su eleccion pa e posicion di presidente tabata e catalisador – oficialmente, al menos – pa e renuncia di Gabinete Wever-Croes II. Interesante pasobra ta apenas dialuna cu a eligie como presidente di Parlamento, loke ta nifica cu entre dialuna y diamars lo mester a prepara e decreto necesario segun Constitucion di Aruba pa e por fungi como presidente di Parlamento ayera caba.
Segun Articulo III.12, e presidente y vice-presidente di Staten ta keda nombra a traves di decreto. Mientras cu no a produci e nombramento, e presidente designa pa e periodo anterior lo actua como presidente. Den e caso aki, lo a resulta den e situacion incomodo unda a pesar cu a eligi Kamperveen, toch ta Edgard Vrolijk kende lo mester a eherce e funcion ainda durante e ceremonia. Sinembargo, no a mira esaki durante e ceremonia, sino cu Kamperveen, kende ta e prome presidente di parlamento cu no ta representando partido MEP of AVP desde 1987, a dirigi su prome acto oficial.
Tocante kico ta spera e parlamento actual prome cu eleccion na december, por bisa cu no ta tanto asina. Mientras cu e parlamento ta keda na nan asiento te cu pasa e mando na e siguiente parlamento, e hecho cu den ehecutivo ta sinta un gobierno demisionario ta limita e tipo di trabao cu parlamento por completa. Esaki pasobra, por ehemplo, introduccion di un ley despues di aprobacion parlamentario, ta rekeri e firma di un minister, y e minister demisionario ta limita su mes na e asuntonan diario y continuacion di maneho. Propuesta di ley di iniciativa parlamentario por tuma lugar, pero lo mester a cana e caminda usual di conseho previo.
Den un comunicado di prensa, Prome Minister Evelyn Wever-Croes e expresa cu e aña aki, e ceremonia pa cu e Aña Parlamentario tabata uno diferente, mirando cu Parlamento despues di 3 aña ta conta cu un presidente nobo, cu lo sinta pa un periodo cortico prome cu eleccion na december proximo.
“Mi ta desea tur parlamentario hopi exito, sabiduria y tambe hopi pasenshi den e siguiente tres lunanan aki. Parlamento di Aruba ta e sala na unda decisionnan grandi pa nos pais ta wordo tuma, y p’esey ta importante pa nos parlamentarionan y ministernan ta uni. Ta solamente hunto nos lo por logra cosnan grandi pa pais Aruba”, Prome Minister Evelyn Wever-Croes a expresa.
Aruba no ta cla pa eleccion
Papiando cu miembronan di prensa despues di e caida di Gabinete Wever-Croes II riba dialuna, Minister di Asunto Economico, Comunicacion y Sostenibilidad (awo demisionario), Geoffrey Wever a bisa cu Aruba no ta cla pa eleccion. “Pais Aruba no ta cla p’e. Nos ta kere cu lo miho lo tabata pa nos por a termina e periodo di gobernacion aki, termina e proyectonan cu tin, y yama un eleccion den fin di mei, juni, manera cu tabata programa,” el a bisa. “Dus mi no ta kere cu ningun hende na Aruba ta sperando un eleccion.”
El a referi tambe na declaracionnan di partidonan politico declarando cu nan ta cla pa eleccion. “Con bo por ta cla pa eleccion si bo ta bezig ta gobernando? Nos ta gobernando tur dia, dus no tin tempo pa sinta prepara pa eleccion.”
Esaki tabata parce un referencia na e comentarionan di prome minister Evelyn Wever-Croes, kende den un video for di sede di partido MEP diadomingo, a indica cu “MEP ta cla pa eleccion.”
