(EFE) – Cerca di 7.5 miyon persona no tin acceso na awa potabel na Honduras, un pais unda 5 miyon persona no tin un saneamento sigur, segun e entidad no gubernamental Mericano, Water for People a indica ayera diaranson.
Specialista den comunicacion di Water for People Honduras, David Ramos a bisa den conmemoracion cu Dia Internacional di Awa cu na e pais centro Americano “cerca di 7.5 miyon Hondureño no tin acceso na awa sigur,” loke ta representa 77,3% di 9.7 miyon habitante.
Na Honduras, un pais cu indice halto di vulnerabilidad pa crisis climatico, por lo menos 5,5 miyon persona, un 56.7% di e poblacion, no tin acceso na un saneamento sigur, segun cifranan oficial cita pa Ramos.
Den su opinion, hopi mucha menor di 5 aña ta muri na Honduras victima di malesa relaciona cu falta di acceso pa awa potabel y saneamento adecua, mientras cu otronan ta bandona scol pa bay den buskeda di e likido vital aki pa nan famia.
Di acuerdo cu un estudio di Water for People, cerca di 90% di e crisis ambiental tin relacion cu problema di awa.
Ramos a señala como “alarmante” cu tanto persona na Honduras no por tin awa potabel, pa loke miles di nan ta depende di suministro mediante truck di awa of ta recuri na pos cu awa no apto pa consumo cu tin likido contamina.
Den algun zona di Honduras, e bari di awa tin un prijs di entre 40 pa 60 lempira (entre 1,62 y 2,44 dollar) un prijs cu hopi biaha e famianan na Honduras no por paga, na unda mas cu 70% di e poblacion ta biba den pobresa.
E representante de Water For People a solicita trabao conhunto di Gobierno y entidadnan no gubernamental pa “solventa e crisis” di awa a traves di realisacion di proyectonan.
