Actualmente e producto mas bendi den fundacion Famia Plania ta e pildo anticonceptivo, lagando atras e uzo tradicional di condom.
Directora di e fundacion aki, Evelyn Ras-Yarzagaray ta bisa cu 5 aña pasa e producto mas bendi no solamente cerca nan sino den e boticanan no ta e preservativo, sino e pildo aki. Un encuesta cu nan a realisa hunto cu Universidad di Aruba na 2013 a mustra cu un 70% di e poblacion ta haci uzo di e pildo, cu ta e producto Microgynon cu tin hopi aña riba mercado.
E ta un producto cu na nivel di hormona ta bay bon cu mayoria di hende muhe. “E pildo ta keda uno tradicionalmente halto den demanda.” Tambe e hangua di un luna tambe ta competiendo cu e uzo di e pildo, considerando cu den e ultimo añanan e hobennan ta mas acto pa algo diferente. Ademas nan no ta core e riesgo cu ta wordo lubida di uza nan.
Uzo di condom
Mientras cu uzo di condom a cay hopi specialmente cerca e barnan na San Nicolas. E ta kere cu un motibo tin di haber cu e impacto di e ceramento di e refineria tempo di Valero. Fundacion Famia Plania ta un di e proveedornan di e barnan cu ta cumpra nan condom na un prijs relativamente abou.
“Kiermen e impacto di e ceramento di refineria tambe nos a sinti’e.”
Encuanto nan clientenan regular, ya sea hoben of adulto, nan a bin cu otro sistema pa acerca nan pa stimula e uzo di condom. Den e grupo aki si nan ta wak un crecemento den e uzo di condom. E no por bisa un porcentahe exacto di cuanto nan a bay atras, ya cu ainda e aña no a cera. Pero te aworaki nan ta calcula alrededor di un 20% nan cay atras riba e suministro di condom na e barnan na San Nicolas.
Pero anualmente debi na e impacto di e ceramento di e refineria, e fundacion por a wak cu nan a bay basta atras den e distribucion di condom, cerca nan clientenan di e barnan na San Nicolas. Mirando cu e barnan aki tin un organisacion cu nan a lanta, aworaki fundacion Famia Plania ta den tramite cu nan pa sondea e manera pa traha di un miho manera. Ya caba nan tabatin e prome contacto y entrante aña venidero, nan lo bolbe sinta pa wak nan necesidadnan pa atende nan.
Pero e ta bisa cu pa loke ta e uzo individual di condom nan ta mira un crecemento. Kiermen e uzo di condom ta keda. Den tur e paketenan cu e fundacion aki ta brinda na e hobennan, ya sea masculino of femenino, e ta inclui. Aworaki e fundacion aki tin miembresia gratis pa hende homber pa nan cumpra nan condomnan na un prijs faborabel. Antes no tabata asina. Pa e miembro menor di 21 aña, nan por haya condom gratis te cierto cantidad den nan pakete anual. Tin hende cu no kier registra, pero si nan ta bay cerca e fundacion pa abastece nan mes di condom na un prijs barata di 4 florin pa un dozijn. Ademas nan tin diferente opcion di condom, no solamente e condom regular, sino cu nan tin pa ehempel cu sabor, etc.. Tur esaki ta stimula e uzo di condom.
