(Time) – Ningun persona a pensa cu e pandemia lo ta facil pa mucha. E virus por afecta nan menos directamente cu hendenan mayor, pero otro retonan – perdida di scol, perdida di hungamento, perdida di tempo cu amigonan – tabatin su propio efecto emocional. Un estudio publica dia 29 di april ultimo den JAMA Network Open ta briya un luz riba e seriedad di e daño aki.

E investigacion, dirigi pa psicologo Tali Ravivi na Northwestern University a involucra un encuesta na mas di 32mil dunado di cuido a cargo di mucha di kleuter te klas 12 den sistema di scol publico di Chicago. E definicion di ‘dunado di cuido’ tabata amplio, incluyendo mayor y welonan como tambe cualkier persona mayor di 18 aña cu responsabilidad principal di cuida mucha den un hogar. E grupo di muestra di famianan tabata etnica- y racialmente diverso – 39.3% blanco, 30.2% Latino, 22.4% color scur, y 8.1% mixto.

E punto clave di e investigacion tabata dia 21 di maart 2020: e dia den cual scol presencial a stop na scolnan publico na Chicago, y a cuminsa scol na cas. Raviv y su coleganan a puntra cada dunado di cuido pa clasifica e muchanan cu nan tabata cuidando riba con nan a exhibi 12 caracteristica diferente den e temporada prome cu e fecha en cuestion, y e tempo despues (e encuesta mes a wordo yena entre dia 24 di juni y 15 di juli.

E resultadonan tabata impresionante. Den tur aspecto negativo, e resultado general a aumenta, y den tur esnan positivo, tabatin un reduccion. Algun tabata cambionan comparativamente chikito: Papia di plannan pa futuro a cay di 44.3% na 30.9% (un cambio di 13.4 punto porcentual); relacionnan positivo cu amigonan a cay di 60.4$ na 46.8% (un reduccion di 13.6 punto porcentual). Pero den otro casonan e cambio tabata mas dramatico. Apenas 3.6% di mucha a ser clasifica como exhibiendo señalnan di sinti soledad prome cu a cera scol, y 31.9% tabata asina despues, un aumento enorme di 28.3 punto porcentual. Apenas 4.2% di mucha a ser clasifica como agita of rabia prome cu e ciere, compara cu 23.9% despues, un aumento di 19.7 punto.

Un cantidad chikito di mucha den e estudio, Raviv ta bisa, a mehora durante e periodo en cuestion. “Alrededor di 7% a beneficia” di e cambio, el a bisa. Por ehemplo, autolesion y idea di suicidio a reduci di 0.5% na 0.4% entre muchanan color scur, y di 0.4% na 0.3% entre mucha Latino. “Por ta cu scol tabata un sitio di stress y aprendisahe remoto tabata bon pa nan.”

Pero esey no ta e caso en absoluto pa mayoria di mucha, y manera hopi cos, rasa, etnicidad y nivel economico a hunga un rol, y den e caso aki muchanan color scur y Latino generalmente a bay miho cu mucha blanco.

En general, e cifra pa caracteristica di ‘soledad’ tabata 31.9% despues di ciere di scol, pero a cay na 22.9% entre mucha color scur y 17.9% entre Latino, compara cu 48.4% entre mucha blanco. Ya cu tur tres grupo a registra tiki mas di 3% prome cu ceramento di scol, e aumento di soledad cu a resulta tabata hopi mas halto entre mucha blanco.

Riba e medida di ‘speransa of positividad’, 36.45 di mucha color scur a reporta e caracteristica, compara cu 30.7% di Latino y 24.6% entre mucha blanco – un reduccion den tur tres caso, pero uno pio entre muchanan blanco cu a cay di 55.7% compara cu 40.2% pa Latino y 49.8% pa color scur.

Pero famia color scur y Latino a sufri di otro manera. Rond mundo nan tabatin mayor probabilidad cu un miembro di famia a contra Covid-19; a perde un trabao, perde un cas, perde seguro di salud; pa tin dificultad pa haya medicina, cuido di salud, cuminda y ekipo di proteccion personal (manera tapaboca). Hasta si e cambio general den salud mental di mucha Latino y color scur ta tabula den e estudio como menos severo cu esun di mucha blanco, nan a experimenta dificultad.

Bayendo dilanti, Raviv y su coleganan ta skirbi cu e pandemia por ta un momento di aprendisahe pa educadornan, cliniconan y legisladornan. E encuesta, nan ta bisa, ta punta na e necesidad pa un compromiso renoba pa mehora salud mental – specialmente acceso na telesalud [consulta via internet]; mehora acceso na servicionan di salud mental basa na scol y comunidad; mehora fondonan pa comunidadnan den necesidad; y un miho esfuerso pa mehora desigualdad structural. E pandemia eventualmente lo caba. E dolor emocional cu e muchanan den tur grupo etnico a sufri por keda cu nan durante un tempo largo ainda.