Un cuidadano ta comenta cu alomenos 100 pa 200 auto a bay e faro pa wak tiro di aña nobo. Lamentablemente e restaurant Faro Blanco a contrata security pa cera e entrada pa autonan bin ariba na e Faro. Cantidad di auto mester a bira bek anto a wordo bisa cu ta prohibi pa drenta e propiedad.
“Nos ta compronde cu hopi auto eyriba lo por a crea un problema. Pero nos mes kier a simplemente para e auto na un distancia anto cana bay wak e tironan ariba. Asina mes tog nos a wordo nenga.”
E cuidadano no ta mucho contento cu esaki mirando cu nan no kier a bay riba propiedad di Faro Blanco. Nan kier a subi riba propiedad di e Faro pa bay mira e tiro di aña nobo anto esaki ta un caminda publico.
“Mi ta compronde cu no kier a causa pa nan cliente keda pega pero no ta husto pa cera henter e area tampoco,” e cuidadano ta comenta. E ta sigui bisa cu algun hende sikiera mester a wordo permiti pa cana bay eyriba. E cuidadano ta bisa cu Faro Blanco no tin ningun derecho pa nenga hende di bay un caminda publico anto cu ta un berguensa cu nan mester a busca security pa esaki.
Motibo di seguridad
Sr. Arthur Kelly, manager na Faro Blanco ta bisa Bon Dia Aruba cu Faro Blanco ta cooperando cu Polis pa cera e caminda aki tur aña desde cinco aña pasa. Esaki tabata un peticion cu a bini for di Polis mes pa motibo cu cinco aña pasa un cantidad grandi di hende a bay wak tiro na Faro anto a pega e entrada. Sr. Kelly ta splica cu cinco aña pasa: “Despues di 12’or nos fiesta ta caba anto tabata tin un cantidad di turista cu no por a sali. Yen bebemento di alcohol, tiramento di botter, tiramento cu otro cu klapchi, tocamento duro cu muziek anto e tabata hopi fastioso. E ultimo turista a sali 3:30 for di akinan pa via di cantidad di hende cu tabata tin akiriba,” Sr. Kelly ta splica. Nan mester a yama Polis e tempo ey pa yuda maneha e situacion cu por a bay for di man. E siguiente aña Polis mes a sugeri pa Faro Blanco pidi pa un permiso pa cera e caminda aki. Tabata tin tiramendo di pagara basta cerca di e tubo di gas di Faro Blanco. E ta un peliger pasobra Faro Blanco tin dos tanki di gas basta grandi anto Brandweer no por subi te na Faro si tin un emergencia.
